Merasîmê vîrardişê qadroyanê pêşengî yê PKK’î Alî Haydar Kaytan û Riza Altunî rê ke do meştî Meydanê Şêx Seîdî de virazîyo, vengê “Ma wayîrê erjanê xo bivejîyê” ame dayene.
Badê ke Rayverê Şarê Kurdî Abdullah Ocalan 27ê Sibate de vengdayîşê “Aştî û Komelê Demokratîkî” da, PKK’î 5-7ê Gulane de Kongrea xo ya 12ine viraşt. PKK 12ê Gulane de beyanatê xo yê kongre de şehadetê qadroyanê pêşengî yê Alî Haydar Kaytan û Riza Altunî eşkera kerd. Amedî de do seba vîrardişê Alî Haydar Kaytan û Riza Altunî yew merasîmê şarî virazîyo.
Do merasîmê vîrardişî Meydanê Şêx Seîdî yê qezaya Sûrî de 18ê Gulane de saete 15:00 de virazîyo.
Hemserekê Komela Kultur û Yewîya Piştgirî û Ardimê bi Keyeyê Kesanê ke Cuya Xo Vînî Kerda ya Dergûşa Şaristanîye (MEBYA-DER) Mehmet Emîn Kiliç wina va: “Ma do seba her di embazanê xo merasîmê vîrardişî virazî. Altun û Kaytan serranê zafan azadîya şarî rê bi vefakarî xebetîyayî. Ma heme şarê xo dawet kenî semedê nê merasîmî.”
Hemserekê DEM Partî yê Amedî Abbas Şahîn, ard vîrî ke çareserkerdişê demokratîkê meseleyê kurdî rê 52 serrî têkoşîn ameyo dayene û wina va: “Do bi şexsê Alî Haydar Kaytan û Riza Altunî heme şehîdê doza merasîmê 18ê Gulane yê Meydanê Şêx Seîdî de bêrê vîrardene. Semedê wayîrê vejîyayîşê pêvajo û erjan ma heme şarê xo dawet kenî Meydanê Şêx Seîdî.”
Hemserekê Partîya Herêmanê Demokratîkan (DBP) a Amedî Rûçem Vefa Elyakût semedê merasîmê vîrardişî veng da û va: “Ma wayîrê erjanê xo bivejîyê.”
