Şarî Çewlîg de Roşanê Newroze bi coşêko pîl pîroz kerd. Hemsereka DBP’yî ya Pêroyî Çîgdem Kiliçgun Uçar bale ant mesajê Rêberê Şarê Kurdî Abdullah Ocalanî ser o û va: “Vengdayîşê Rêzdar Ocalanî zaf muhîm o. Ma na Newroze bikerê Newroza azadîya Rêzdar Ocalanî ya fîzîkîye.”
Şarê Çewlîgî bi dirişmeyê “Raybertîya Azad Komelo Demokratîk” bi pêşengîya DEM Partî, DBP û TJA’yî Newroze pîroz kerd. Pîrozkerdiş Kuçeyê Nêweşxaneyî de virazîya. Bi hezaran kesî kom bîyî û dormeyê adirî de Newroze pîroz kerd. Hemsereka DBP’yî ya Pêroyî Çîgdem Kiliçgun Uçar, Parlementerê DEM Partî yê Çewlîgî Omer Faruk Hulaku, rayberê DEM Partî, DBP, aktîvîstê TJA’yî û bi hezaran welatî beşdarê pîrozkerdişî bîyî. Welatî şilîye reyde zî kom bîyî û Newroze bi coş û kelecano pîl pîroz kerd. Şarî meydanê Newroze bi beyreqanê DBP, DEM Partî û kesk, sûr û zerdî xemilna. Welatî bi cil û berganê Kurdkî beşdarê pîrozkerdişî bîyî. Verê ke bername dest pêbiko welatîyan vera dawile û zirne govende girewte.
Pîrozkerdişî de seba gandayeyanê Kurdistanî rêz ame girewtiş û bername dest pêkerd. Sifteyî Hemserekê DBP yê Çewlîgî Emîne Yalçin û Şevket Kalindamar vejîyayî sahneyî ser û silam da şarî. Dima Parlementer Omer Faruk Hulaku qisey kerd û dîyar kerd ke na Newroze seba înan zaf tarîxî ya û prosesê tarîxî de vîyarenê. Omer Faruk Hulakuyî ard ziwan ke na Newroza yê azadîye ya û va: “Vengdayîşê Rêzdar Abdullah Ocalanî yê tarîxî çimê heme şaranê dinya antî Kurdistanî ser o. No vengdayîş cuyêka pîya û rumetin o. Tirkîya de bi serran o ke polîtîkayê înkarî est ê. La bi xoverdayîşê xo ma Kurdan bi heme dinya xo da şinasayene. Ma pîya vera xo da. Ma do pîya bi ser bikewê.”
Dima Hemsereka DBP’yî ya Pêroyî Çîgdem Kiliçgun Uçar adirê Newroze veşna û şarî sloganê “Bijî Serok Apo” berz kerd. Şarî dormeyê adirî de govende girewte û sloganî vatî.
Badê veşnayîşê adirê Newroze Hemsereka DBP’yî Çîgdem Kiliçgun Uçar vejîyaye sahne ser û Newroza şarî pîroz kerd û wina va: “Ez nameyê DBP’yî ser o silam dana şima. Rojanê tarîxî, vengdayîşêko tarîxî de vîyarenê. Vengdayîşê Rêberê Şarê Kurdî Abdullah Ocalanî tarîxî yo. Vengdayîşê komelêko demokratîk o. Vera polîtîkayanê asîmîlasyonî û qeyyûmî ma xover da. Û ma va qeyyûmî do tena Kurdan rê nêrê. Ewro ma dî ke Îstanbul de bi seyan kesî ameyî destbendkerdiş. Demokrasî heme Tirkîya ya rê lazim a. Bi saya Rayberê Şarê Kurdî Abdullah Ocalanî yo. Şarê Kurdî senî ke bi seyan serran o xover dano, ewro zî dormeyê vengdayîşê Rayberê Şarê Kurdî Abdullah Ocalanî de ameyo têhet.. Ma na cografya de adirê azadîye yê. Hetêk proses yena vatene la Rayberê Şarê Kurdî hewna zîndan de yo. Proses wina nêbeno. Lazim o ke heqê hêvî bêro şuxulnayene. Wa na Newroze biba azadîya Rayberê Şarê Kurdî. Senî ke Çewlîgî îradeyê xo rê wayîrîye keno, nika zî Rayberê xo rê wayîrîye keno. Wa rayîrê ma akerde bo.”
