Serekê Komleya Penceşêrî ya Tîrêjên Rojê onkolog Dr. Halîs Yerlîkaya dîyar kerd ke komeleya înan verba laşo ganwerî de ameyo awankerdiş û bal ant ser têkoşînê verba laşo ganwerî de û wina va: “Ma laşo ganwerî ra nêtersenî, ma erêmendişî ra tersenî.”
Amed de komêk doktor û embazanê xo Komeleya Penceşêrê ya Tîrêjên Rojê akerdî. Serekê Komele zî onkolog Dr. Halîs Yerlîkaya yo. Komele aşma Kanûna 2024î de ameya awankerdiş. Komele Amed de semînerêk ser laşo ganwerî (kanser), xopawitişî laşo ganwerî û têkoşînê verba ci de viraşt.
Serekê Komleya Penceşêrî ya Tîrêjên Rojê onkolog Dr. Halîs Yerlîkaya derheqê awankerdişê komele û nêweşîya laşo ganwerî de ajansê ma rê qise kerd.
Komele verba têkoşînê laşo ganwerî de ameyo akerdiş
Dr. Halîs Yerlîkaya dîyar kerd ke komeleya înan zaf newe ya la belê xeyalanê înan zaf girde û wina va: “Her ke şono humara mergî ya rîyê laşo ganwerî zêdîyeno. Ewta de xalêko avzel est o, o zî tespîtkerdişê nêweşîye yo. Ganî komel zî na babete de hayîdar bibo, çiqas lez nêweşî bêro tespîtkerdiş tedawîya ci zî wina asanî bena. Demo ke nêweş ame marhaleya çarine, nêweşî vilayî pêroyîya laşî bena û pêvajoyêka zehmet vejîyena verê ma. Ma wazenî bi rayîrê komeleya xo şarê xo verba nêweşî de hayîdar bikerî û ma wazenî şarê ma baldar hereket bikero. Ma wazenî nêweş lez bêrê kontrolê nêweşî ke lez bêro tespîtkerdiş. Rewşa psîkolojîk de û rewşa merdimi ke nêeşkenî biresî tedawîye û her wina warê huquqî de ma hetkarî danî nêweşan û keyeyê înan. Semedêk awankerdişê komeleya ma zî no yo. Mîyanê ma de xebatkaranê weşîye, avukat, psîkoloj zî est ê. Ma hewl danî ke şaristanê herêmî de zî şaxanê xo akerî û vila bibê. Ma komeleya newe akerda, demêko derg verê ma de est o, ma wazenî komeleya ma heme welatî ra vila bibo.”
Semedê nêweşîya laşo ganwerî
Halîs Yerlîkaya ard ziwan ke her serra ke şona nêweşîya ganwerî zêde bena û wina domna: “Qey nêweşî zêde bena? Seba ke na herêm, herêmêka şer a, eke herêmêka şer de pêkewtişî bibo, psîkolojîya merdiman weş nêbeno, pakî zî çin a, merdim nêeşkeno debara xo bikera, werdiş û şimitiş weş nîyo, no dem zî na herême zî laşo ganwerî zî zêde beno. Herêma ma de bi zafêr deme nêweşî resenî marheleya çarine yenî nêweşxaneyan û nêweşîya înan tespit beno. Semedê ci zî feqîrî, nêzaneyî û bindestî yo, her wina nêbîyayîşê tedawî ya bi ziwanê dayîke yo. Nê heme semed ê, herêma ma zaf kesî mirenî.”
‘Her çik bi kurdkî weş a la dermananê kurdkî nêbaş ê’
Yerlîkaya wina ard ziwan: “Her çik bi kurdkî weş a la tedawîya dermananê kurdkî nêbaş ê. Qey dermananê kurdkî nêbaş ê? Seba ke mîyanê nê dermanan de çi est o, ma nêzanenî. Nê giya kotî de şîn û pîl benî. Wa ma bizanî ke no derman mîyanê gonî de senî vila beno. Tedawîyanê dermanê kurdkî yê giyayî ma dîyenî ke zaf rayan başkerdişî ra zafêr nêbaşbîyayîşî vejeno werte. Velkanê laşî ziwa kenî, wa şarê ma doktoranê nê warî de pispor ê goş bidê înan. Nêweşîya laşo ganwerî ya roqila mabenê komelî de zaf yenî dîyayîş, verê ma tespîtê seba nêweşî, 50 serrî ra cortir ra pêşnîyaz kerdî la ma nika emir vistê 45î. Seba ke êdî na nêweşî mabenê kesê emre înan şenikî de zî yeno dîyayîş. Verê tespîtkerdiş zehmet bî, derfet çinî bî la nika tespîtkerdiş asan o.”
Pêşnîyazanê têkoşînê verba laşo ganwerî de
Yerlîkaya peynîya qiseyê xo de no pêşnîyaz û nêsîhetanê têkoşînê verba nêweşîya laşo ganwerî de kerd: “Seba cinîyan, kesê peynîya 40 serrî wa seba lez bêro tespîtkerdiş bêrê kontolî û fîlmê mamografi biancî, merdim zî yê cixare zaf ancenî tomografi biancî. Emrê kesêkî 45 serrî derbas bîyo, çi nêweşî çin bo zî tedawîya kolonoskopî keno. La belê verê înan zî ma eşkenî verê laşo ganwerî bigê. Ma do senî bigî? Serî de w ama fek cixare ra veradê, çikê ke tutin mîyanî de bibo, ma qet nêancî. Ma werdiş û şimiştişê xo ra baldar bibê. Kontrolê seba laşo ganwerî cuya pawiyeno, wa ma laşo ganwerî ra nêters ê, ma erêmendişî ra bitersî.”
