Platformê Şaxanê Dêrsimî yê KESK’î, seba bûtçeya serra 2026î Çarşîya Binerdî ser o beyanat da. Pêrabesteyê platformî, temsîlkarê dezgehanê komelê sivîlî û partîyanê sîyasîyan ê şaristanî û xeylê kesî tewrê beyanatî bîyî. Beyanat de ame vatene ke ê welatêk wazenê ke bacê înan seba perwerde, weşîye, edalet, aştîye û demokrasîye bêrê xerc kerdene.
Platformê Şaxanê Dêrsimî yê KESK’î, seba bûtçeya serra 2026î Çarşîya Binerdî ser o beyanat da. Beyanat de pankartê “Ma a bûtçeya ke şima şarî ra gênê û erşawenê sermaye û tekelan red kenê. Ma bûtçeya adîle, ameyoxo biewle wazenê” ame akerdene. Metnê beyanatî Serekê Şaxê Dêrsimî yê Sendîkaya Kedkaranê Xizmetanê Îdareyê Herêmî û Şaredarîyan (Tum Bel-Sen) Mazlum Dogan wend.
‘Sermaye patronan rê barê ci zî ma rê’
Mazlum Dogan îfade kerd ke kêmanîya bûtçeye her roje vêşîyena û yeno waştene ke bedelê na zî şarî rê bidê dayene û va ke ê sey KESK’î do destûr nêdê.
Mazlum Dogan wina va: “Mîtînganê herême yê ke ma kerdî de, ma kursîya kede rona. Ma na kursîye ra pêro pîya qîra ke ma şarî rê butçe û welatêko demokratîk wazenê. Ma tîya ra reyna veng danê. Na teklîfê bûtçeye de kedkarê gelemperî çin ê; karkerî, teqawutî, kedkarê heqê asgarîyî, cinîyî, wendekarî, dewijî çin ê. Na teklîfê bûtçeye de seba îstîhdamî û xizmetanê gelemperîyîye çime çin o. Ma qebul nêkenê û red kenê ke çimeyê ke ma viraştê, bacê ke ma dayê, şirê sermaye û patronan rê û barê ci zî ma ser o bimano. Ma têna xo rê nê, heme kesî rê nêwazenê.”
Mazlum Dogan da nîşan dayene ke ê bacî de edalet wazenê û qiseykerdişê xo wina qedîna: “Ma welatêk wazenê ke bacê ma seba perwerde, weşîye, edalet, aştîye û demokrasîye bêrê xerc kerdene. Heyetê Pêroyî yê TBMM’î do seba raydayîşê bûtçeya dişmenê kede û dişmenê şarî 21ê Kanûne de kom bibo û ma zanê ke sey ê verênan no teklîfê bûtçeye zî do bi zafanê rayanê blogê îqtîdarî bêro qebul kerdene. Reyna ma zanê ke peynîya her tarîye roşnî ya. Her çi ra raşt, 22yê Kanûne do bibo rojêka ke ma roşnîye rê benê nêzîk.”
