Ertugrul Kurkçu dîyar kerd ke îqtîdar hetêkî ra bi rayîrê pêvînayîşanê Rayberê Kurd Abdullah Ocalan xîret keno ke sînyalanê pozîtîfan bişawo, hetê bînî ra vera CHP’yî xîret keno ke rejîmê otorîterî newe ra cabikero, ganî komel însîyatîf bigêro.
Hemserekê Rûmetî yê HDP’yî Ertugrul Kurkçuyî ANF’yî rê qisey kerd û ard ziwan ke rîskê operasyonanê vera CHP’yî ercnayî û vat: ‘’Rejîm bi eqlê kurdan kumar kay keno. Hetêkî ra îqtîdar rejîmêkê otorîterî yê neweyî awan keno la hetê bînî ra keno ke mîyanê komelî de bawerîya cuya arame virazo. Kurdî vînenê ke çîyo ke ameyo sereyê înan hê sereyê CHPyî de yê. Qesawetê ‘fedakarîya seba haştîye, rejîmê zorbazî rê fayde kena’ girseyan sîyasetî ra dûrî fîneno.’’
Kurkçuyî operasyonê bi nameyê ‘Pêkerdişê Şaristanî’ yê vera muxalefetî wina ercna: ‘’Wextêkê winayênî de ke serekkomar û hemkarê ci venga lîderê PKK’yî danê ke çekan war verdo û rêxistine vila bikero, yanî çîyo ke ci rê vanê ‘teror’ yeno wedaritene bi nê çîyî beşdarîya kurdan a bi weçînayîşan yena krîmînalîzekerdene. A raşte îqtîdar keno ke weçînayîşanê 2028î de îtîfaqê mabênê CHP û DEM Partî xera bikero.’’
Kurkçuyî pêşnîyazê komelê demokratîkî yê Rayberê Kurd Abdullah Ocalanî ercna û vat: ‘’Aseno ke îqtîdar û dewlete ancî bi ‘zemînê huqûqî û demokratîkî’ nêeşkeno îmtîhanî derbaz bikero. Seba ke zemînê demokrasî û huqûqî awan bibo ganî komel înîsîyatîf bigêro.’’
