Her cayê şaristanan nika binê adirê germê hamnanî de veşeno. La koyê Baxire û Warê Qoşan de dinya hîna wisarê verênî dana ramitene. Ma waşt ke rindekîyanê nê cayanê bimbarekan bi dimen û çend resman bare bikime.
Koyê Baxire, qezaya şaristanê Dêrsimî Pilemûrîye û qezaya şaristanê Erzinganî Têrcan mîyan de yew koyêde bimbarek o û 3282 metro berzîya xo est a. Seba Elewîyanê herême koyêko zîyarî yo zî. Mîyanê ekosîstemê koyanê Munzurî de cayê xo gêno û hetê vaşanê endemîkan û cîya cîya heywananê kovîyan de zaf dewlemend o.
Her cayê şaristanan nika binê adirê germê hamnanî de veşeno. La koyê Baxire û Koyê-Warê Qoşan de dinya hîna wisarê verênî dana ramitene. Ma waşt ke rindekîya nê cayanê bimbarekan bi dimen û çend resman bare bikime.
Germê hamnanî ke ame zereyê suka Dêrsimî de pelge nêlewîna. Warê Qoşan û Koyê Baxire de hîna boya zimistanî yena û zaf cayan de vewra sipî hîna xoverdana ke nêhelîyo. Tayê cayanê Koyê Baxire de hîna newe newe vaşî benê kewe. Tayê cayan de zî vaşî teze ameyê wextê çînitene. Mordem şodir, şande û zafêrî zî şewe henîke honiko tede cemedîno.
Gile Koyê Qoşan û gile koyê Baxire jîyarê, cêrê xo zî ware yê
1994’î ra ver hîna dewê Dêrsimî hetê dewlete ra nîameybî talkerdene hamnanî şarê Dêrsimî şîyêne waranê ververê nê koyan. Mal û dewarê xo berdêne nê zozanan û qatixê xo nê koyan de arêdayêne. Debarê xo serê mal û dewarî bı. Bawerîya înan de cayê nê jîyaran hîna hîna zî cîya yo. Şîyêne ser qurbanê xo kerdêne, loqmeyê xo kerdêne vila. Bara verg û yabanî, teyr û tûrî dêne. Hetanê payîzê peyênî ware de mendêne.
Nika ke beno wisar tena Şawaqijî konanê xo benê nanê ro û mîyanê xo çiraynenê. Ê zî nêbê nê koyî bêveng û bêkes manenê. La vengê xoza bi xo her daîm cayê xo de ro.
Xozaya welatî de vengê awe kemî nêbeno
Xoza kilamanê xo ziwanê xo de vana. Endî mesê hingimênî danê arê. Seba naye çîçege bi çîçege gêrenê. Awe serê sêneyê koyan de gimenê. Darê mazênî, gul û sosinî, boye danê. Dewîjî cêr de vaşan çînenê naxire çiraynenê, lodanê vaşî berz kenê.
