Hemwelatijê Binarê Qendîlî vat ke şarê êzidî tarîxî ra nata raştê xeylê qirkerdişan ame la vera heme tewir hêrişan komelê êzidîyan milê xo çewt nêkerd û hema zî xover dano.
Hemwelatijê ke dewanê herêma Binarê Qendîlî de ciwîyenê bi munasebetê serrgêra qirkerdişê êzidîyan ser erjnayîşî kerd û vat komelê êzidîyan vera hêrişan milê xo çewt nêkerd.
Kak Rênasî ard ziwan ke amancê hêrişê DAÎŞî yê 2014î çînkerdişê êzidîyan bi û vat tehdîdê vera Şengalî ewro zî bi tewiranê cîya cîyayan dewam kenê. Rênasî bale ante muhîmîya destkewteyanê Rojava û Şengalî ser û vera hedefgirewtişê hêzanê pawitişê meşru yê êzidîyan hêrsê xo ard ziwan û vengdayîşê pawitişê destkewteyan kerd.
Dewa Bokriskanî ra Şênîye Dilşer Îbrahîmî zî ard ziwan ke şarê êzidî bê paştdayîşê teberî, bi hêzê xo werişt pay û bale ante yewîye û xopawitişî ser.
Şênîye Dildar Rojhilatîyî zî dîyar kerd ke kurdî çar parçeyan de bi tedayan rî bi rî yê û vat şarê êzidî vera heme tewir hêrişan îradeyê xo pawit û ewro ra tepîya zî xoverdayîşê xo do bidomno.
