Şengal – Cinîyê ke tewrê rayraşîyayîşê girseyî yê Sinûnê bîyî, vat: “Xeynî gedeyanê ma, kes ganî pawitişê Şengalî nêkero. Ganî Îraq estbîyayîşê înan qebul bikero û heqê komelê ma bido. Ganî hêzê pawitişî, sazgeh û dezgehanê ma nas bikerê.”
Demêko ke Şengal de hêzê leşkerî yê dewleta Îraqî zêde bîyî. Nuqtayanê kontrolî ser o komelê êzidî yenê vindertene, nasname înan ra yeno waştene, problemî înan rê yenê vetiş. 1ê êlule de kombîyayîşêk de, bê temsîlkaranê komelê êzidî, Bexdad de qerarî derheqê Şengalî de ameyê girewtene û derheqê hêzanê pawitişî yê Şengalî de qerarê bêçekbîyayîşî ameyê dayene.
Nerazîbîyayîşê komelê êzidî yê seba na rewşe her ke şono zêde beno. Tewr peyên 6ê êlule de Şengal de rayraşîyayîşêko girseyî ame viraştene û hukmatê Iraqî ra ame waştene ke na zext înan ser o ra bêro rakerdene û hêzê pawitişê Şengalî bêrê nasnayene. Cinîyê ke tewrê na meşe bîyî, erjnayîşê xo ajansa ma ra pare kerd.
‘Eke ma bêveng bimanê, do çîyê xirabêr bêrê serê ma’
Mamosta Cîlan Silêmanî îfade kerd ke seba nerazîbîyayîşê xo yê vera zêdebîyayîşê hêzanê leşkerî yê Îraqî yê Şengalî û nêdayîşê heqanê êzidîyan, Sinûnê de rayraşîyayîşêk viraşt û wina va: “Nê demanê peyênan de xeylî nuqtayê kontrolê leşkerî ameyê ronayene. Reyna hêzanê ma yê leşkerî ra wazenê ke çekê xo ronê. Hêzê ma yê pawitişî nêyenê qebulkerdene. Ma vera nê çîyî yê. Ma nêwazenê hêzê ma çekê xo ronê. Ê ke pawitena ma bikerê gedeyê êzidxanî yê. Ma nuqtayanê kontrolî de xeylî reyan yenê vindarnayene . Eke wextê fermanî de hende nuqtayê kontrolî bîbîyêne, hende çî nêamenê serê êzidîyan de.”
‘Ma do qebul nêkerê ke hêzêko xerîb pawitena ma bikero’
Cîlan Silêmanî vengdayîşê hukmatê Îraqî kerd ke hêzê pawitişî, sazgeh û dezgehê êzidîyan bêrê qebulkerdene û wina vat: “Kesêko xerîb ma mîyan de çin o, komelê ma bixo pawitena xo keno, xo bixo rayra beno. Ma zî beşêk Îraqî yê û dewaya heqê xo kenê. 74 fermanî ma ser o bîyî. Heta nika zî qirkerdişêk ma ser o bîyî nêameyê qebulkerdene. Ma wazenê qirkerdişêk ma ser o bîyî bêrê qebulkerdene û hêz û sazgehê ma bêrê qebulkerdene. Vengdayîşê mi seba komelê ma zî no yo ke vera na rewşe bêveng nêmanê. Ma qebul nêkenê ke yewo xerîb bêro pawitena ma bikero, bêro ma rayra bero.”
‘Ganî komelê ma zêdeyêr wayîrê Şengalî vejîyo’
Hemsereka Sazgehê Keyeyanê Şehîdan ê Şengalî Dayê Pakîz Celale zî îfade kerd ke Şengal de têgêrayîşêk zêde yê leşkerî est o û wina qisey kerd: “Nuqtayê kontrolî ameyê zêdekerdene û komelê ma rê problem yenê vetene. Ma Şengalî yê, Îraqî yê. Nasnameya ma pêron zî bi Îraqî ra girêdaye ya. Ma Îraqî ra wazenê ke hêzê ma qebul bikero. Ewro cengawerê ma, YBŞ-YJŞ û Asayîşa Êzidxanî pawitena ma kenê. Teberê Şengalijan kes Şengalî nêpawo. Têgêrayîşê Azadîye ame ma xelisna, şehîdî daye. Ma wazenê ke pawitena herême bi destê gedeyanê herême bêro kerdene.”
Dayê Pakîz Celale dîyar kerd ke bawerîya êzidîyan bi tu hêz û şexsêko bînî nêyeno û wina vatişê xo qedêna: “Bawerîya ma bi nê hêzê ke wextê fermanî de ma reyde nê koyan de têşan û vêşan menda est a. Kesêk ke teber ra bêro, zerrîya xo herra ma rê nêdejneno. Ma hêvî Homayî ra kenê ke komelê ma zêdeyêr xemê welatê xo de bo.”
