Şengal de, nêzdîyê mezelgeha Şerfedînî, bi beşdarîya daîreya Tipa Edlî, merdimê kesanê ke cuya xo ra bîyî û şarî, mezela komî ke 76 cenazeyan ware yeno, ame akerdene.
3ê tebaxa 2014î de çeteyê DAIŞ’î hêriş berdî komelê Êzidî û Şengalî ser o. No fermana ke ameyo cuyayene de, bi des hezaran Êzidîyî ca û warê xo bîyî, bi hezaran kêna û cinîyê Êzidî kewtî destê çeteyanê DAIŞ’î û nêzdîyê 100 goranê komî pey xo verdayê.
Nê cenazeyê gorê komî yê mezelgeha Şerfedînî, hetê PDK’yî ra, seba testê înan ê DNA’yî bêro kerdene, serra 2016’î de Xanesorî ra ameyê vetene û bi hawayêko bêserûber tîya ameyê nimitene. No çî mabenê komelê Êzidî de bîyo hêrs û nerazîbîyayîşêko zaf gird. Ê demî ra heta nika waştişê şarî o yo ke nê gorî bi hawayêko lezabez bêrê akerdene.
Esteyê ke ameyê vetene do seba Tipa Edlî yê Bexdadî bêrê erşawitene
Tewr peyên, gorî komî yê verê mezargeha Şerfedînî, hetê Daîreya Tipa Edlî yê Bexdadî û merdimanê cangorîyan û komelê Êzidî ra bi merasîmêko dînî ame akerdene.
Goreyê agahîyan, karê akerdena gorê komî do hewteyêk heta 10 rojan dewam bikero û esteyê ke ameyê vetene do seba Tipa Edlî yê Bexdayî bêrê şawitene.
77 mezelê komî ameyê akerdene
Hewceyê vîrardişî yo ke seraserê Şengalî de heta nika 96 gorî komî û bi desan gorî ferdî est ê. 77 gorê ameyê akerdene û heta nika 19 hebî mendê. 561 cenazeyê ke heta nika nê goranê komî ra ameyê vetene zî, Tipa Edlî yê Bexdadî de yenê vindarnayene.
