Serekwekîla Grûba DEM Partî Gulîstan Kiliç Koçyîgît kombîyayîşê ewil ê komîsyonê Meclîs de qisey kerd û dîyar kerd ke Abdullah Ocalan sîyaseto demokratîk sey rayîrê çareserîya probleman nîşan dano û vat: “No reyêka bîne nîşan dano ke rayîrê sîyasetê demokratîkî çend muhîm o.”
Serekwekîla Grûna Partîya Têduştî û Demokrasîyî ya Şaran (DEM Partî) Gulistan Kiliç Koçyîgît kombîyayîşê Meclîsî de qisey kerd ke bi munasebetê çareserîya meseleyê kurdî ameyo awankerdene. Gulistan Kiliç Koçyîgît îfade kerd ke meseleyê kurdî problemêko sereke yo ke bi serran o çareserîya ey yeno taloqkerdene: “Esasê xo de seba çareserîya demokratîk, sîyasî û aştîyane ya meseleyê kurdî ma tîya de yê. Ez wazena dîyar bikera ke no kombîyayîş seba cuya hempare, huqûq û ameyoxêko demokratîk ê heme hemwelatîyanê Tirkîya îstîfaker bibo.”
Gulistan Kiliç Koçyîgît qiseykerdişê xo wina domna:
“Meseleyê kurdî ganî tena meseleyê şarê kurdî yê azadîye û hemwelatîya seypê de nêro erjnayene, eynê wextî de ganî sey çalakkerdişê prensîbê huqûq, sîyaseto azad, huqûqê wa û birayî û dewleta huqûqî de zî gamêka adilane û sereke ya. Ganî sey awankerdişê cuyêka seypê ya bingeyê adilane ser o bêro erjnayene. Nê çarçeweyî de xebatê komîsyonê ma seba çareserîyêka menda, rayîranê çareserîyêka hîra û asankerdişê qonaxanê çareserî firsendêko tarîxî pêşkêş keno.
Perspektîfeke zafhetî lazim o
Lazimtîya sereke ya welat, şar û komelê ma bi kulturê demokrasî yê muzakereker ke hetanê huqûqî, sîyasî, kulturî û aborî zî gêno zereyê xo. Bêguman meseleyê kurdî bîyo çimeyê xeylê probleman. Ne problemê hemwelatîya têduşt a elewîyan ne heqê kedkaran ê ke yenê werdene ne zî problemê cinîyan meseleyê kurdî ra cîya nîyê. Bi nê munasebetî ma vanê ke lazim o êdî her mesele bi perspektîfêko demokratîk, seypêpawitox û zafhetîpawitox bigîrîyo dest.
Meclîs wayîrê rolêko tarîxî yo
Nê çarçeweyî de ma wina bawer kenê ke komîsyonê ma hem seba xurtkerdişê zemînê mitabeqetê sîyasî hem zî averberdişê rayîranê mizakereyan de do xeylê îstîfaker bo. Seba ke Tirkîya prangayanê xo yê neçareserî ra rizgar biba û rayîrê bedilîyayîşo demokratîk de aver şêra, meclîs wayîrê rolêko tarîxî û muhîm o. Xeylê muhîm û biqîmet o ke no proses zemînê meclîsî de ame destpêkerdene.
Ganî çi bêro kerdene?
Ma a bawerî de yê ke no komîsyon zî do bi perspektîfêko ke ziwanê aştî û zemînê sîyasetê demokratîkî xurt biko, bixebito. Nê çarçeweyî de lazim o beşdarîyêka demokratîk mîyanê xo de heqanê kolektîf û îmkanê temsîlkarîya sîyasî zî bihewînoç Beşdarbîyayîş ganî tena bi weçînitişî bisînor nêmano; beşdarîyêka seypê ya prosesanê qerardarî de, rayberîyanê herêmî, xurtkerdişê rayberîyanê herêmî û rêzgirewtişê heverê îradeyê şarî zî ganî tede bibê. Tayînkerdişê qeyûman, prosesêko winasîn o ke heqanê demokratîk ê heme welatijan bisînor keno.”
