KNK’yî roşanê çarşema sor ê şarê êzidî pîroz kerd waşt ke roşan bibo wesîleyê aştîya domdare.
Konseya Rayberî ya KNK’yî bi eşkerayîyêk roşanê Çarşema Sor ê komelê êzidî, şarê kurdî, şaranê Kurdîstanî û herême pîroz kerd.
KNK’yî eşkerayîya xo de waşt ke roşan bi mana, tarîx, dîn û erjê xo yê tarîxî mîyanê heme komel û şaran de bibo wesîleyê aştîya domdare û vat: “Ma nika Çarşema Sor pîroz kenê. Tehdîd û tehlukeyê serê komelê êzidî yê Şengalî, Efrîn û Serêkanî dewam kenê. Rewşa Şengalî hema tam dîyar nêbîya û tehdîdê qirkerdişêko newe hema zî rojev de yo. Her çend şarê ma dest bi agêrayîşê Efrîn û Serêkanî kerdo zî nê her di herêman de yê ke êzdayî ra bawer kenê, binê tehdîd û tehlukeyî de yê.”
KNK’yî dewamê eşkerayîya xo de nê çîyî vatî: “Şengal bi temsîlîyetanê xo herêmêka wayîrê taybetmendîyanê cîyayan o. Zafê şarê ci Kurdê êzidî yê û Şengal parçeyêke herra Kurdîstanî yo. Semedê na taybetmendî zî serê seyan serran o bîyo hedef. Tewr peynî de zî wehşetê ke hetê DAIŞ’î ra Şengal de ame kerdene, birînê xorînî bedenê Şengalijan de akerdî.
Nika zî hukmatê Bexdadî zî mîyan de hetê hinî hêzan ra, Şengal de dem bi dem provokayonî yenê viraştene. Amancê nê provokasyonan o yo ke Rayberîya Xosere ya Şengalî bêro rijnayene û şarê Şengalî bê rayberî û bê pawitene verdê. Ganî îradeyê şarê Şengalî esas bêro girewtene. Seba parastina komelê êzidî, ganî heme hêz û şarê ma hişyarî bê û wayîrê şarê ma yê êzidî vejîyê. Ganî Şengal û rewşa şarê Şengalî bi hawayêko taybet bêrê destgirewtene û çareserî ci rê bêro dîyene.
Eşkerayîya KNK’yî bi nê îfadeyan qedîyaye: “Şarê kurdî, pêroyî şarê Kurdîstanî, wayîrê kamcîn bawerî benê wa bibê, ganî bi berpisyari têbigêrê. Ganî vera neyaranê hov û îşxalker, mîyanê yewîyêka sozdare de têbigêrê. Seba cuyêka bi rûmete ya ameyoxî, goreyê erj, mana û mukadesê qedîman têbigêrê. Sewbîna zî bawermendê êzidî, yaresan, elewî, ehlî heq û mesîhî, ganî bi zîhnîyetê taybet bêrê pawitene.
Azadî û bextewarî reyde pîrozkerdişê roşananê ma zî serkewtişê ma reyde girêdaye yo. Manayê Roşanê Çarşema Sor zî na berpirsîyarî û bawerî ma ra wazeno. Sey KNK bi na hêvî û waştişî, ma reyna roşanê Çarşema Sor komelê êzidî, şarê kurdî û pêroyê şaranê herême rê pîroz kenê.”
