Endamê Konseya Rayberî ya Şaredarîya Şaristanê Cenevreyî Alfonso Gomez ard ziwan ke vengdayîşê Rayberê Şarê Kurd Abdullah Ocalan avzel o û wina va: “Wa Dewleta Tirk verpersê bido vengdayîşê aştî rê, ma hadre yê ke hetan seba dayîşûgirewtişan Cenevre de bikerê meyman.”
Tûrê diyine yê weçînayîşê herême yê Şaredarîya Kantonê Cenevreyî yê Swîsreyî, 13ê Nîsane de yo. Namzetê Partîya Keskan, Endamê Konseya Rayberî ya Şaredarîya Şaristanê Cenevreyî Alfonso Gomez ke tûrê destpêkî de cayê xo rêza diyine de girewt û xo seba tûrê diyine hadre keno, ser pêvajoya bi pêşengîya Rayberê Şarê Kurd Abdullah Ocalan yeno averberdiş ANF’î ra qise kerd.
Vengdayîş pozîtîf dîyeno
Alfonso Gomez ard ziwan ke nê vengdayîşê ‘Aştî û Komelo Demokratîk’ ê Rayberê Şarê Kurd Abdullah Ocalan pozîtîf dîyeno û wina va: “Ez paştî dana vengdayîşê aştî rê. Cenevre paytextêkê heqê merdiman o, eynî demî de paytextê aştî yo. Ez her tim wina vana; Her kesê ke wazenê ser aştîye qise bikerê; berê Cenevreyî akerde yê. Bêguman ez bi kêfweşî vengdayîşê Birêz Ocalan pêşwazî kena, seba ke çi heyfo trajedîya şarê kurd bi des serran dewam kena, rîyê şerê mîyanxoyî û şerê azadîye ke ma no şerî bi rengêko raşt bi name bikerê û bi se hezar merdiman cuya xo daye. Dejê zaf giran ameyê antişî û zaf kurd nêçare mende ke Tirkîya ra fek veradê û sey welatê bîn Swîsreyî zî xo ra sitargehêkî dîyê.”
Nîqaşê serbestveradayîşê Ocalanî
Gomez aşkera kerd ke destpêkerdişê dayîşûgirewtişan zaf avzel o û wina domna: “Ma bale xo bidê ser finakê Afrîkaya Başûr, do demê waştiş û tedayî mîyanneteweyî estbî. Hukmatê Afrîkaya Başûr hepisxane de bi Nelson Mandela dest bi dayîşûgirewtişan kerd. No pêvînayîş nê tena Mandela serbest verada û eynî demî de îmkan da pêvajoya dayîşûgrewtişan ke dewam bikero. Na yewe nîno no maneyî ke nîqaşê ser serbestveradayîşê Ocalan bi peynî bibo. La belê nêzdîbîyayîşê Birêz Erdoganî mi veradano mîyanê gumanan de. Seba pêvînayîş aver şîro ma do heme îmkanan pêşkêş bikerê. Wa Dewleta Tirk verpersê bido vengdayîşê aştî rê, ma hadre yê ke hetan seba dayîşûgirewtişan Cenevre de bikerê meyman.”
