KCK’yî dîyar kerd ke ê bi xemgînîyêka pîle bi wefatê Emîne Ocak hesîyayê û vat: “Têkoşînê dayîka Emîne û pêro merdimanê vindîbîyayeyan do têkoşînê ma yê sosyalîzmî, azadî û demokrasîyî roşnî bikero.’’
Hemserekîya Konseya Rayberdişî ya KCK’yî seba wefatê Maya Şemeyî Emîne Ocak mesajêk weşana. Mesaj wina yo:
”Ma bi xemgînîyêka pîle bi wefatê Emîne Ocak hesîyayê ke a bi têkoşîn, xoverdayîş û cigêrayîşî edaletî şinasîyayêne û sembolanê Mayanê Şemeyî ra yew bîye. Ma keye, merdiman û şarê ma rê, bi taybetî Mayanê Şemeyî rê serweşîye wazenê.
Dayîka Emîneya ke bi têkoşînê xo yê qerardar û isrardarî seba ke aqîbetê lajê xo Hasan Ocakî bimusa bîye çimeyê cesaretî û hêzî yê pêro merdimanê vindîbîyayeyan. Dayîka Emîne 27ê Gulana 1995î de Meydanê Galatasarayî de serkêşîya çalakîya merdimanê vindîbîyayeyan kerd û pêro cuya xo de qetî têkoşîn û cigêrayîşê edaletî ra fek vera nêda. A hîrakerdişê têkoşînî û caardişê vîrê komelkîyî de rolêko girîng kay kerd.
Têkoşînê sembolê cigêrayîşê edalet û raştîye yê dayîka Emîne û pêro merdimanê vindîbîyeyayan do têkoşînê ma yê sosyalîzm, azadîye û demokrasîyî roşnî bikerê. Ma soz danê ke do xeyalanê înan ê seba aştîye, edalet û demokrasîyî bîyarê ca. Ma ancî keyeyê Ocakî, merdiman û şarê xo rê û Mayanê Şemeyî rê serweşîye wazenê.”
