Bi pêşengîya dezgehanê ekolojî, qezaya Çewlîg Kanîreş de, vera projeyanê talankerdişê xoza rayîrşîyayîş û mîtîng virazîyeno.
Bi pêşengîya Têgêrayîşê Ekolojî yê Mezopotamya, Kanîreş de vera projeyanê talankerdişê xoza û xirabkerdişê sîstemê ekolojîk mîtîng do bêro viraştene. Dima ke Gimgim de mîtîng virazîya, xoverdayîşê vera projeyanê talankerdişê xoze ewro Kanîreş de dewam keno. Platformê cugehî, komela ekolojî û pawitoxê xoza ke xeylê şaristananê Vakurê Kurdîstanî û Tirkîya ra ameyî, înan reyde şarê herême vera projeyanê Santralanê Enerjî yê Jeotermalî (JES) bîyî yew veng û rayîrşîyayîş kenê.
Rayîrşîyayîşî de pankartê “Ma do cuye bipawê”, “Ma rayîr nêdanê jeotermalî”, “Ma jeotermalî nêwazenî” ameyî akerdene û her wina dowîzê “Piştgirîye danê cîwîyayene”, “Ne Tonî, ne Cinî, ne HES, ne zî JES; ganî her kes yew bibo”, “Pawitişê dewa ma pawitişê ameyoxê ma yo” ameyî kiriştene. Sloganê “Bêveng memanê, eke şima bêveng bibê dore do bêro şima”, “Ma do bi xoverdayîşî serkewte bibê” ameyê vatene.
Girseyê şarî ke temsîlkarê dezgehanê sivîl û ekolojîstî zî mîyanê ci de bîyî, çatrayîrê qeza de ameyî têhet û dest bi rayîrşîyayîşîş kerdî. Rayîrşîyayîşo ke bi vatişî slogananê pawitişê xoza û erdî dest pêkerd, heta vernîya awanîya Şaredarîya Kanîreşî do dewam bikero.
