Îsraîlî sersefîrîya verî ya Amerîka ya Tehranî bi manayê hêzê leşkerî yê Îranî tede manenê, bombabaran kerd. Sewbîna IDF’yî dîyar kerd ke heta nika dayo 10 hezar hedefan ro û 2 hezar leşker û fermandarê Îranî kiştê.
Hêzê Hewayî yê Îsraîlî (IDF) eşkera kerd ke hêrişanê xo yê hewayî Îran de domnenê. Goreyê eşkerayîya IDF’yî, heta nika çarçewaya nê operasyonî de zafêrê 800 teyareyan reyde hêrişî ameyê kerdene. IDF’yî eşkerayîya xo de îdia kerd ke nêzdîyê 10 hezar hêrişê asmênî nêzdîyê 4 hezar amancanê leşkerî ameyê kerdene. Eyn eşkerayî de ame vatene ke nê hêrişan de nêzdîyê 16 hezar cebilxaneyî ameyê şuxulnayene.
‘2 hezar fermandar û leşkerî ameyê kiştene’
Eşkerayî de ame dîyarkerdene ke encamê nê operasyınan de zafêrê 2 hezar leşker û fermandarê Îranî ameyê kiştene. Goreyê eyn çimeyî bi hewayêko hemdem, hêrişanê Îranî reyde IDF’yî xeylê cepheyanê şerî de zî operasyonî kerdê û nêzdîyê 7 hezar amancî hedef girewtê.
Sersefîrîya verî ya DYA’yî ameye bombabarankerdene
Eşkerayî de ame vatene ke sersefîrîya verî ya DYA’yî hedef ameya girewtene. Ame eşkerakerdene ke Mihafizê Şorişî yê Îranî û Besîcî na awanî d e ameyê bicakerdene û encamê bombabaranî de xeylê leşkerê Îranî ameyê kiştene.
