Sîyasetmedaro kurd, nuştox û aktîvîsto elewî Haydar Îrfan Dayiogluyo ke xeylê serrî yo Ewropa de surgunkerde yo, 16ê nîsane de herêma Bretagne ya Fransa de şi heqîya xo.
Agahîya mergê Îrfan Dayioglu yê hetê keyeyê ey ra ameye dayene. Ame zanayene ke Îrfan Dayioglu 16ê nîsane saete 01:30î de cuya xo vîndî kerda.
1980î ra nat cuyêka surgunkerda
Dayioglu serrêk derbeya 12ê Êlule ra ver vejîya teberê welatî. Serra 1982î ra nat Fransa de sey multecîyo ke polîtîk ciwîyayêne. Dayiogluyo ke cuya xo daye têkoşîno şorişger, gêrayîşê azadîye yê şarê kurdî û rêxistinbîyayîşê komelê elewîyan zewijnaye bi û gedeyêkê ey est bî.
Dayioglû weşananê Cephe, Xelisîyayîşo Komelkî û Xoverdayîşî de nuşteyî nuştî û rojnameyanê Ozgur Gundem û Ozgur Polîtîka de kuncnuştoxîye û muxabîrîye kerde.
Mabênê serranê 1996-2003î de Federaayonê Elewîyanê Kurdîstanî de îdarekarî kerde. Demanê peyênan yê kovara Zulfîkarê ke Ewropa de yena çapkerdene û serranê ewilan yê kovara Semahî de îdarekarîya pêroyî ya weşanî kerde.
Reyna di serdemî sey temsîlkarê Yewîya Elewîyan Kongreya Neteweyî ya Kurdîstanî de wezîfeyê endamtîye kerde. Medya TV’de serrêk rejîsorîya programê ‘Erkanê Elewî / Alevî Erkanı’ kerde.
Kitabo bi namaeyê “Yew Rêxistine – Yew Cuye – Mehmet Koç / Bir Örgüt – Bir yaşam / Mehmet Koç” ke Îbrahîm Yalçin reyde nuşte, tarixê têkoşînî de sey beşdarîyêka muhîme cayê xo girewt. Kitabêko bîn yê Îrfan Dayiogluyî “Dik Duruş / Vindertişo Tîk” o.
