Waye û birayanê Hozan Mizgîne, Şukran û Şeyhmus Aydin ser serrgêra 33. Şehadetê waya xo qise kerdî. Qalê vîrardişê xo yê ci rê kerdî û destnîşan kerdê ke Mizgîn nê tena şervanêk bî, a hunermend û şaîrêkî bî.
Hunermenda vengweş û awazşîrîn Hozan Mizgîn (Gurbet Aydin) serra 1962î de dewa Bileydere yê bi ser merkeze Êlihî de yo, maya xo ra bî. Verê Darbeya 1980î beşdarî têkoşînê azadîye yê Kurdistanî bena. No dem de zî Êlih de Mazlum Dogan, Mahsum Korkmaz xebatanê rêxistine aver benî. No dem Hozan Mizgîn beşdarî komêka ciwan, refê PKK’î bena û bena yewin cinî ke na herêm de beşdarî mîyanê PKK’î bena.
Hozan Mizgîn mîyanê yewin koma wendekaran de ca gêna ke seba dewreyêka perwerdeyê îdeolojîkî verê xo danî Kampa Bekayê. Hozan Mizgîn dima perwerdeyî, seba rêxistinkerdişê xebatanê kultur û hunerî serra 1980î de bi Hozan Sefkan şona Ewropaye û uca de pîya bingeyê “Hunerkom” û “Koma Berxwedanê” ronenî. Nê serran de bi deyîranê xo ke behsê xoverdayîş û cuyaya zehmetî ya şarê kurd keno, deyîrê sey “Çemê Hêzil”, “Newroz”, “Lo Hevalno” û “Gundîno Hawar” vengê ci reseno goşanê her kurdêkî azadîwaşt û welatperwerî.
Dima xebata xo yê hunerî ya Ewropa, Hozan Mizgîn demê zehmetî de seba rêxistinkerdişê cinîyanê kurdî verê xo dana koyanê Kurdistanî. Bi ked û têkoşînê xo destpêkî tesîrê cinîyan ra kena û dima zî tesîrê heme şarê Tetwanî ra kena. Hozan Mizgîn êdî Tetwan de bi name û veng bena û 11ê Gulana 1992î de keyeyî ke maneno, çi heyfo yeno dorpêçkerdiş û a zî şer kena. Seba ke zana bi saxî nêvejîyena, xo îmha kena.
Waya Hozan Mizgîne, Şukran Aydine (65) û birayê a Şeyhmus Aydin (56) serra 33. a şehadetê Hozan Mizgine ser o qise kerd û qalê vîrardişê xo yê bi Hozan Mizgîne ra kerdê.
Her tim vatine wa cinî azad bibî
Şukran Aydin ke behsê vîrardişê xo yê bi Hozan Mizgîne ra kerd, wina va: “Cinîyêka xeylî efendî û baş bî. Doman bî her kesî pawitine, cinîyêka azadîwaşt, waştine ke cinî û welat azad bibî. Demo ke talebe vejîyaynî, PKK’î ra vatinî talebe. Doza Kurdistanî û rêça ci nas kerd êdî fek veranêda. Ma armancê a xo ra zanenî. Demê ma werd hadre kerdine, goştarîya domanan kerde û her tim hetê domanan de bî. Dima ke doza Kurdistanî fam kerd û bonder bî. Ma rê zî va; şîîranê kurdkî ma rê vatine. Vate: ‘Bonder bibî, ez do şima rê bivaja, şima zî dibare bikerî.’ Ma rê kitab dayne û wendine. Wexto ke şehîd kewt, pîyê mi hîna sax bî, pîyê mi serra 1976î de rehmet kerd. Wexto ke ma şehadetê eşnawit dayîka mi zaf dejîya. Qesebaya ma parçe bî. Mizgîn tena nê gerîla bî, hem şaîr hem zî hunermend bî. Gonî şehîdan xeylî bi qedîr û qiymet ê.”
‘Ma talebe yê, Apocî yê’
Birayê Hozan Mizgîn Şeyhmus Aydin zî behsê xebatanê Hozan Mizgîne kerd û wina qedîna: “Mizgîne karê propogandayî kerde. Hetê Egîdî mende, mi meraq kerd û înan ra persa, şima çi yê? Vatî: ‘Ma talebe yê, Apocî yê’ no dem mi nas kerd înan û Mizgîn zî beşdarî PKK’î bî. Verî ke Kenan Evren bêro ser dewlete, peynîya darbeya 12ê Êlule Mizgîn û embazanê a şaristan ra vejîyayî û şîyî derbasî Lubnanî bîyî. Mizgîn dima derbasî Filîstan zî bena û uca ra zî şona Ewropa. Ray ray ma rê telefon kerdine. Dima rojêk telefon ame û vatî Mizgîne Şehîd kewta. Ma rê vatî, dima şehîtkewtişê Mizgîne, bi hezaran nameyê kênayanê xo kerdî Mizgîne. Verekna Mizgîn ewta de bibinî û qelabalixiya Newrozan bidînî.”
