FEY-KURD’î derheqê averşîyayîşanê vengdayîşê tarîxî yê Rayberê Şarê Kurdî Abdullah Ocalanî ra pey vindertişê hukmatê Danîmarka persa. Ame vatene ke Danîmarka û Yewîya Ewropa bi hewayêko eşkera paştî danê nê prosesî.
Vervatoxê Federasyonê Komeleyanê Kurdan ê Danîmarkayî (FEY-KURD) Şoreş Bîlîkanî Serekwezîrê Danîmarkayî Mette Frederîksen û Wezîrê Karanê Teberî Lars Lokke Rasmussen rê derheqê vengdayîşê ‘Aştî û Komelo Demokratîk’ yê Rayberê Şarê Kurdî Abdullah Ocalanî mektûbo eşkera nuşt û cehdkerdişê prosesê aştî Tirkîya de vindertişê fermî yê hukmatê Danîmarka persa.
Mektub de reyna ame vîrvistene ke Rayberê Şarê Kurdî Abdullah Ocalanî bi vengdayîşê xo yê 27ê sibate semedê aştî vengdayo, dima ra rêxistina ey PKK’yî adirbest îlan kerdo û ame vatene ke nika şar hêvî keno ke vernîya pêkewtişanê 40 serran bêro girewtene.
Mektub de hukmatê Danîmarka ra ame waşteneke wa semedê paştîdayîşê prosesî gaman bierzo û nê her di persî ameyî persayene:
- Hukmatê Danîmarka semedê paştîdayîşê nê prosesê aştî Tirkîya do gamêk bierza?
- Danîmarka semedê heq û asayîşê kurdan do senî yew xebete rayra bera û semedê nê senî fikirîyena?
Wezaretê Karanê Teberî yê Danîmarkayî bi nameyê Serekwezîrî û Karanê Teberî cewabo hempar da. Mektub de nê ameyî vatene: “Wezaretê Karanê Teberî yê Danîmarkayî averşîyayîşanê Tirkîya nizdî ra taqîp keno û semedê qedînayîşê pêkewtişê mabênê PKK û dewleta tirke her gama ke yena eştene bi keyfweşî pêşwazî kena. Caardişê waştişanê şarê kurdî zî tede zaf muhîm o ke Tirkîya goreyê heqanê merdiman ê mîyanneteweyî têbigêra.Yeno hêvîkerdene ke her di hetî nê fersendî bierjnê û semedê aştî û demokrasîyî gamanê pêtan bierzê. Danîmarka û Yewîya Ewropa eşkera paştî danê nê prosesî.”
