Prof. Hans-Lukas Kieserî va: ”Ameyoxê demokratîkî yê Rojhelatê Mîyanênî kurdî eşkenê dîyar bikerê. Hinî kurdê Lozanî çîn ê. Hêzê înan est o ke bi projeyanê xo yê sîyasîyan serkêşîye bikerê.”
Profesoranê Unîversîteya Zurîhî ra tarîxans Hans-Lukas Kieserî prosesê mabênê dewleta tirke û Têgêrayîşê Azadîye yê Kurdan û averşîyayîşê Rojhelatê Mîyanênî ANFyî rê erjnayî.
Kieserî ard ziwan ke rixmê pêro gamanê pozîtîfanê ke têgêrayîşê kurdan semedê çareserkerişê meseleya kurdan eştê dewleta tirke hema zî teredut kena û nê vatî: ”Hetêkî ra tayî qala prosesê haştîye kenê hetê bînî ra tayî teredut kenê. Nê kesî demokrasîyî ra tesenê ke kontrolê înan ê otorîterî çîn bikero. Rixmê pêro zorîyan ez nê prosesî sey firsetêkî vînena ke gerek nê rê bêro wayîrvejîyayene. Semedê bedilnayîşê Tirkîyaya otorîterî têkoşîno demokratîk hewce keno.”
Hans-Lukas Kieserî nê vatî: ”Badê hêrişê Hamasî yê 7ê teşrîna verêne Rojhaletê Mîyanênî de dengeyî bedilyayî. Hêrişê Hamasî û dimara bi şerê Îsraîlî herême de averşîyayîşî dewam kenê. Bitaybetî bi rijnayîşê Esasî zaf çî têgêrayî. Ez eşkera vajî ameyoxê herême do bibo demokratîk. Rojhelatê Mîyanênî inkey newera yeno dîzaynkerdene. No proses beno ke wextê dergî de ameyox vaat bikero. Pekî potansîyelo demokratîk ça de yo? Ez eşkera vajî ke ez nê kurdan de vînena. Ne Sûrîye de ne Iraq de ez eşkena qala warê demokratîkî yê îdealî bikerê. La ez qala cehdkerdişê demokraîtkî, îrade, hêzê xîyalêkê sîyasî bikerê. Ez qala îradeyê sîyasî yê semedê demokrasîyî kena. Tîya de bêdewlete zî bê kurdî sefanê vernî de yê. Mabenê kurdan de averşîyayîşê girdî est ê. Sey verî û wextê Lozanî nîyê. O wext kurdî rehet bîyênî cîya. Çunke o wext nê netewî ne zî demokratîk û sîyasî projeyêkê înan bibê. O wext kapasîteyê xîyalkerdişê ameyoxî yê kurdan çîn bi. La nika rewşe bedilyaye. Hema zî tay problemî est ê la averşîyayîşo muhîm est o. Babeta hemkarîya bi aktoranê mîyanneteweyîyî de zî averşîyayîşê girdî est ê.”
