Halîde Turkoglu: Ma do serkêşîya cinîyan de Aştî û Komelê Demokratîkî awan bikerê. Ma do tim vera hêriş, şîdet û qirkerdişan, talanê kede û xoza têkoşînê xo pîlêr bikerê.
Vervatoxa Meclîsê Cinîyan ê DEM Partî Halîde Turkoglu merkezê partîya xo de kombîyayîşê çapemenîye kerd.
Halîde hêverî serrgêra Şorişê Rojawanî fîraz kerd û pare kerd ke Şorişê Rojawanî şorişê cinîyan o.
Halîde Turkoglu şehîdê Qirkerdişê Pirsûsî yad kerdî û vat ke ê do hesabê nê qirkerdişî bi têkoşînê xo bipersê.
Halîde bale ant merasîmê çekvêşnayîşî yê 11ê temmuze ser o û vat: “No merasîm seba aştî firsendêko tarîxî yo. Coka ganî Meclîs de sereraştkerdişê qanûnî û huqûqî bêrê kerdene û komîsyon bêro awankerdene. Ganî cinîyî nê komîsyonî de cabigêrê.”
Halîde îfade kerd ke cinîyî serkêşîya caardişê Vengdayîşê Aştî û Komelê Demokratîkî bikerê û vat: “Ma bi şîarê ‘Mi rê aştî lazim a’ vejîyayî waran û çalakîyî kerdî. Paştîdayîş û têkoşînê cinîyan do aştî bîyarê ca. Ma seba ke waranê têkoşînî pîlêr bikerê û aştî bîyarê ca rêxistinîya xo xurtêr kenê.
Cînayetê Ayşe Tokyaz nimûneya rewşa cinîyanê nê welatî yo. Kiştoxê Ayşe polîs Cemîl Koç ame pawitene û verê nê cînayetî nêame girewtene. Bi nê hawayî ma ancî fam kerd ke Peymana Îstanbulî çend muhîm a. Îqtîdaro ke qirkerdişê cinîyan bi qanûnan paweno mesuldarê qirkerdişan o.
Qanûnî kenê ke cinîyan warê cuye ra dûrî bifînê û keyeyan de heps bikerê. La ma do destûr nêdê ney û seba heqanê cinîyan tim têkoşîn bikerê.
Ma ancî soz danê ke mesuldarîyanê ke Vengdayîşê Aştî û Komelê Demokratîkî keweno ma milî bîyarê ca. Ma do rêxistinîya xo pîlêr bikerê, têkoşînê azadîya cinîyan berz bikerê û nê erdî de haştîya rûmetêne awan bikerê. Ma do serkêşîya cinîyan de Aştî û Komelê Demokratîkî awan bikerê. Ma do tim vera hêriş, şîdet û qirkerdiş, talanê kede û xoza têkoşînê xo pîlêr bikerê. Biciwîyo paştîdayîşê cinîyan. Jin Jîyan Azadî.”
