Rêxistina DEM Partîye ya Hezexî hemverê hemşaredare Turkan Kayir ke partî ra ameya îxrackerdiş, rayîrşîyayîşêk organîze kerd û venga aye da ke îstîfa bikera
Rêxistina Partîya Têduştî û Demokrasî (DEM Partî) ya Hezexî ya Şirnexî, hemverê hemşeredara Hezexî Turkan Kayir ke 31ê adare de DEM Partî ra ameybî weçînayîş û badê zî partî ra ameye îxrackerdiş, rayîrşîyayîş organîze kerd.
Hemserekê DEM Partîye yê Hezexî Niyazî Çevrî dîyar kerd ke Turkan Kayir partîya înan ra ameya weçînayîş la goreyê waştişê şarî tênêgeraya û venga Turkan Kayir da ke îstîfa bikera.
Parlamenterê DEM Partîye yê Şirnexî Mehmet Zekî Îrmez zî ard ziwan ke Hezex de 8 serrî qeyûm estbî û vat: “Armancê qeyuman dizdî û talan bî. Şarê Hezexî hemverê nê dek û dolaban zî DEM Partî sey îradeyê xo weçîna. Hemserekîya ke mîqyasê rêxistina ma ya, nas nêkerdî. Ma zî sey DEM Partî veng danê ke Turkan Kayir îradeyê şarê Hezexî teslîmê şarî bikera. Semedo ke meclîsê Şaredarîya Hezexî hemşeredarenê neweyan dîyar bikero, ganî Turkan Kayir îstîfa bikera. Heta ma îradeyê şarê Hezexî teslîm bikerê do çalakîyê ma dewam bikerê.”
Badê eşkerayîye girse derbazê verê şeredarîye bî û uca de zî sloganê “Turkan Kayir îstîfa bikere” ameyê vatene.
