Heyetê Îmraliyî yê DEM Partîye heqê pêvînayişî ke pê ardî de beyanat da û destnîşan kerd ke heme pêvînayişê înan weş vîyartê û seba aştî û çareserîye şarî do bibo faktoro tewro muhîm.
Wekîlanê DEM Partîye Pervîn Buldan û Sirri Sureyya Onder 28ê Kanûna 2024î de Hepisxaneyê Îmraliyî de bi Rayberê PKK’î Abdullah Ocalan ra pêvînayiş kerdê. Heyeto ke Sirri Sureyya Onder, Pervîn Buldan û Hemşaredarê Şaristanê Girde yê Mêrdînî Ahmet Turk pê ame, peynîya pêvînayişê Îmraliyî de ser waştişê Abdullah Ocalan rê bi partîyê sîyasî û sîyasetmedarê hepsî ra pêvînayiş kerdê.
Heyetê Îmraliyî yê DEM Partîye, heqê netîceyê pêvînayişan de beyanatêk bi raya pêroyî ra bar kerd.
Pêroyîya beyanatî wina yo:
“Ma 28ê Kanûna 2024î de Îmrali de bi birêz Ocalan ra pêvînayişêk kerd. Dima nê pêvînayişê ma, ser netîceyê nê pêvînayişî û ser waştişê ey, ma bi Meclîsê Pêroyî yê Tirkîya, partîyê sîyasî û embazanê xo yê sîyasetmedarî yê hepsî ra pêvînayiş kerdê.
3yê Çeleyê 2025î de ma serdanê Serekê Meclîsê Girde ya Tirkîya birêz Numan Kurtulmuş kerd û pêvînayişê ma destpê kerdê. Pêvînayişê ma bi serek û temsîlkaran, Partîya MHP’î, Partîya Gelecekî, Partîya AKP’î, Partîya Saadetî, Partîya CHP’î û Partîya Dewayî, Partîya Yenîden Refahî ra dewam kerd. Ma mabênê 11-12ê Çeleyê 2025î de serdarê hemserekanê xo yê verê û embazanê ma yê sîyasetmedarî yê hepsî birêz Fîgen Yuksekdag, birêz Selahattîn Demîrtaş, birêz Leyla Guven û birêz Selçuk Mizrakli kerd û ma bi înan ra pêvînayiş kerdê.
Nê pêvînayişanê ma ser esasê dîyalogî û aştîye de û ser pêvajoya bedilyayişê ramanan bi hemserek û desteyanê ma yê partîye, bi pêrabestayanê partîya ma, bi partîyanê sîyasî yê ke ma tifaqî de yê û rêxistinanê sivîlî yê ke ma bi înan ra yê ameyê destpêkerdiş û dewam kerdê.
Serî de ma hûrmet û spasîyê xo pêşkêşî heme partîyê sîyasî û berpirsîyanê înan ê qedîrberz kenê ke bi zerîgermî û zerînêzmî pêşwazîya ma kerdê, erc û pêşnîyazanê xo yê erjîya bi ma rê bar kerdê û bi ziwanêkî zafê awankerde û rexneyanê xo ardê ziwan.
Xala sereke ya rojeve serdanê ma nê bî ke ma netîcayanê pêvînayişê bi birêz Ocalan rê resnenê înan û rewşa newe ke vejyayo werte bi pîya biercnî. Bi kilmî, no waştiş û îrade, seba çareserîya mayînde ya problemê kurd û bipeynîkerdişê pêvajoya pêkewtişî, berpirsîyarîya tarîxî ya xurtkerdişê yewîyeya tirk û kurdan, berpirsîyar geşedanê radîkal Rojhîlatê Mîyanên bivindero û destnîşan keno ke Meclîsê Girde yê Tirkîya û sîyasetê demokratîke zemînê tewrê muhîmî ya çareserîye yo.
Heme pêvînayişanê ma bi zerrî û bi hêvîya weşî vîyartê. Serekê payeberz û heyetê înan hetkarîya xo seba pêvajoya aştîye dîyar kerdê. Ci ra girêdayî babetê tewir bi tewir fikar û pêşnîyazanê înan zî virazîya. No fikar û pêşnîyaz zî esasê xo de ser zelalîya pêvajoye û îcrakerdişê ci mîyanê TBMM’î de bivinderê.
Heyetê ma pêvînayişan de seba çareserkerdişê fikar û persan beyanat dayê û pêşkêşî kerdê. Fikrê ke ma pêvînayişan bi dest vist ke waştiş û îradeyêka hembar heme hetê sîyasî de est o û heme hetê waştiş pêvajoya nakokî û alozî ya ke seba problemê kurd virazîyaya pey xo de biveradê.
Vîyartişê nê problemî û averberdişê yewîyeyî û birayîya heme pêrabestayê etnîkî, dînî û mezhebî welatê ma de, seba menfaet û xêrê her kesî yo. No nêzdîbîyayiş hembar o heme hetan ra. Babetêka bîn ci ra girêdayî zî pêvajoya aştîye biba semedê demokratîkbîyayişê pêroyî û herakerdişê warê sîyasetê demokratîke.
Pêvînayişê ma yê serek û embazanê ma hepisxaneyan de zaf weş vîyartê. Embazê ma bi awayêkê aşkera û zelal hetkarîya xo nîşan kerdê ke birêz Ocalan û DEM Partîye do bi rolê xo wedarîyê. Dîyar kerdê ê do na pêvajo de berpirsîyarîya xo ya seba xurtkerdişê zemînê sîyasî û komelî bi awayêkê weşî pê bîyarê.
No dem de ma ser aştî, demokrasî û yewîyeya Tirkîya û herême ra vindenê, usulê cîyawaşt û pêşdarazê ke dem bi dem ma medyaya nuşteyî û dîtbarî de rî bi rî manenê û warê spekulasyonî yê ke yenê awankerdiş, karê ma zehmet keno. Ma zanenê ke her kes û beşanê komelî heqê na pêvajoye de wayîrê hêvî û waştişî yê. Eynî demî de fikar, hesasîyet û berpirsîyarî her kesî est ê. Ma na hîşmendîye de yê. Pêvajoyêka wina hesasî de, vilakerdişê qiseyanê bi viraşte û hewldayişê xelqkerdişê rojevê ke ray ray sînorê exlaqî zî vîyarenê, germkerdiş û gurkerdişê şerî cîya çiyêkî yê.
Heme fikir û ercnayişê xo yê weş ê demêko kilm de serdanê birêz Ocalan bikin û seba ke pêvajo bi rêbazanê qewîmya biresa aştîye û çareserîyêka wan biba ma do kedêko gird bidê.
Awankerdişê aştî û çareserîye de hetkarî şarî ya ser pêvînayişê ma de do bibo tewro muhîmî yê.”
