Heyetê DEM Partî yê Îmraliyî Başûrê Kurdîstanî de Mesûd Barzanî ra dima Serekê Herêma Kurdîstanî Nerçîrvan Barzanî reyde ame têhet.
Heyetê DEM Partî yê Îmraliyî ke di reyî Rayberê PKK’yî Abdullah Ocalanî reyde pêvînayîş kerd seba ke mesajanê Abdullah Ocalanî pare bikerê Başûrê Kurdîstanî de pêvînayîşan keno.
Heyetê Îmraliyî ewro seatanê serê sibayî de Neçîrvan Barzanî reyde ame têhet. Pêvînayîş ofîsê Barzanîyî yê Hewlêrî de ame kerdene.
Endamê Heyetê Îmraliyî Pervîn Buldan û Sirri Sureyya Onder, Hemserekê DBP’yî yê Pêroyî Keskîn Bayindir, Buroyê Huqûqî yê Asrinî ra Ozgur Erol û Îbrahîm Bîlmez, Hemvervatoxê Komîsyonê DEM Partî yê Têkîlîyanê Teberî Berdan Ozturk, parlamenter Gulcan Kaçmaz Sayyigit û Mehmet Kamaç tewrê pêvînayîşanê Başûrê Kurdîstanî bîyî.
Heyetî 16ê sibate de pêvînayîşê xo yo verêne Serekê PDK’yî Mesûd Barzanî reyde kerdbi. Heyetî silamê Abdullah Ocanî û mesajê ci yê derheqê prosesî Barzanî reyde pare kerdbî. Badê pêvînayîşî Ofîsê Çapemenîye yê Barzanî eşkerayîya xo de vatbi Barzanî do paştî bido prosesê neweyî.
Hemserekê DBP’yî yê Pêroyî Keskîn Bayindir ke heyete de ca girewtêne, badê pêvînayîşî beyanatêko kilm da.
Bayindirî vat: “Kedkarê çapemenîye yê erjayeyî, ez bi hurmet şima silam kena. Heyetê ma ewro Serekê Herêma Kurdistanî Nêçîrvan Barzanî reyde pêvînayîş kerd. Ma pêvînayîşî ra zaf hêvîdar ê. Pêvînayîşê ma de Nêçîrvan Barzanî û heyetê ey, seba averşîyayîşê prosesî û çareserkerdişê meseleyê kurdan wayîrê helwestêko neteweyî û pozîtîf bîyê. Eke Vakurê Kurdistanî û Tirkîya de proses aver şêro, no seba ameyoxê şarê kurdî zaf muhîm o. Şarê kurdî rê çareserî û aştî lazim ê. Pawitişê heme dînamîkanê kurdan averşîyayîşê prosesî yo. Nê pêvînayîşî ma de zî rêzdar Nêçîrvan Barzanî dîyar kerd ke seba ke proses aver şêro do piştîyêka pîle bido. Ma şarê xo ra vanê, ma sey sazî û dezgeyanê kurdan do seba averşîyayîşê aştî û çareserîye nê prosesî de cehd bikê. Ma seba piştîdayîşê Nêçîrvan Barzanî zaf şa yê, ma ey rê zaf-zaf sipas kenê.
