Pêvînayîşê Heyetê DBP û DEM Partî Vakûr û Rojhelatê Sûrîye de dewam kenê. Heyet Hemsereka Dayîreyê Têkîlîyanê Karanê Teberî ya Rayberîya Xosere Îlham Ehmed reyde ame têhet.
Heyeto ke Hemserekê Partîya Herêman a Demokratîk (DBP) Keskîn Bayindir, Parlamentera Partîya Têduştî û Demokrasîyî ya Şaran (DEM Partî) Salîha Aydenîz, Gulcan Kaçmaz, Mehmet Kamaç û Serhat Erenî ra yeno pê, seba ke beşdarê “Konferansê Yewrêzî û Yewhêlwestîya Kurdî Rojavayê Kurdîstanî de” bibo, vizêr şi Vakûr û Rojhelatê Sûrîye. Endamê heyetî ewro şaristanê Qamişlo de Dayîreyê Têkîlîyanê Karanê Teberî yê Rayberîya Xosere yê Herêma Vakûr û Rojhelatê Sûrîye. Heyet hetê Hemsereka Dayîreyê Têkîlîyanê Teberî Îlham Ehmed û endamanê dayîreyî Xalid Îbrahîm û Gulistan Elî ra ame pêşwazîkerdene.
Pêvînayîşî de Keskîn Bayindirî dîyar kerd ke ê bi ameyîşê herême keyfweş bîyê û vat: “Ma silamê şarê xo şima rê ardê.” Bayindirî bale ant muhîmîya konferansî ser o û da zanayene ke konferans do çîyêko tarîxî bo û ê do bi beşdarîya konferansî keyfweş bibê. Reyna wina hêvî kerd ke konferans do bibo bîngeyê yewîya neteweyî ya Kurdîstanî. Bayindirî îfade kerd ke heyetê înan hedîseyê ke Vakûr û Rojhelatê Sûrîye de qewimîyenê, înan nêzdî ra taqîb kenê.
Bayindirî îfade kerd ke eleqeyêka gird a şarê kurdî seba hedîseyanê Rojavayî est a û bi Rayberîya Xosere bawer ê. Bayindirî bale ante “Vengdayîşê Aştî û Komelo Demokratîk” ê Rayberê Şarê Kurdî Abdullah Ocalanî ser o û da zanayene ke tesîrê nê vengdayîşî Vakûr û Rojhelatê Sûrîye ser o gird o.
Îlham Ehmed zî bale ant yewîya neteweyî û vat Rayberîya Xosere seba xizmetê şarî amade ya ke heme çî pêşkêş bikera.
