Hesen Tunç o ke 40 serrî yo dewa xo ra dûrî mendo vano ke: “Ma wazenê ke aştî bêra û verê ma ya bibo, reyna ma şêrîme dewa xo. Ma rê îta giran yeno, ma uca de bîme pîl, kar û gureyê ma uca de bî, jîyar û dîyarê ma uca de bî, haştîye bêro ke ma şîme dewa xo.”
Hesen Tunç, nika zerê Pîlemûrîye de weşîya xo ramneno. Eslê xo ra dewa Dêrsimî Şenîya Axayan ra yo. Dewa ey hetê eskeran ra 1994î de ameya talkerdene, badê talkerdişî şonê ewnîyenê ke dewa înan ameya veşnayene. 94î ra nat Pîlemûrîye de naxir weye keno û uca de weşîya xo ramneno.
Hesen Tunçî 94î ra tepîya çi dîyo, çi kar û gure kerdo ajansê ma rê behsê înan kerd.
‘Dewa ma ra ma kerdîme teber’
Hesen Tunç, destpêkê qiseykerkerdişê xo de behsê veşnayîşê dewa xo kerd û vat: “Ver de dewe şîyane kerde yasaq. Tepa şîme dewa xo ke, dewe vesnaya. Dima bese nêkerdîme şîme dewe. 94î ra tepîya zereyê Pîlemûrîye de mendîme. Zerê Pîlemûrîye de bese nêkenîme naxir weye bikerîme. Rayê est a, janê sarî est ê, vaş çin o, awe çin a; seba kar û gure îta giran o. Se bikerî me, ma wazenê ke şêrê dewa xo, hesretê dewa xo kenîme. Nika destê ma ra tewa nêyeno. Key ke bîme emeklî, sonê dewa xo.”
‘Wazenîme aştî bêra, ma peyser şîme dewa xo’
Tunçî qîseykerdîşê xo de dîyar kerd ke ê wazenê aştî bêra, ê peyser şêrê dewa xo û wîna dewam kerd: “No çi halo ke tederîme! Jar û dîyarê ma kûne ma vîrî, xerîbîye kenîme, mezelê ma ûzade bîyê belsîz(bêwayîr). Çûtûr xo rê raye bîvînîme; omîdê ma kotî yo, nêzanenîme. Axîr some(şîyayîş) key beno? Her çîyê ma dewe de mend. Çutir peyser şêrîme heq zaneno. Wazenê me aştî bera, verê ma ya bibo, ancîna şerîme dewa xo. Ma rê îta giran yeno, ma uca de bîme pîl, kar û gureyê ma uca de bî, jîyar û dîyarê ma uca de bî; aştî bera ke ma şîme.”
‘Sarê xo ra vanîme şêrîme dewa xo, uca şên bikerîme’
Hesen Tunç qiseykerdişê xo wina qedîna: “Sarê xo ra, cîranûnê verênan ra vanîme ke, bêrê pîya şêrîme dewa xo şên bikerîme. Sîma ke ameyê dewe, teyna werdene û sîmîtene ser o yenê, hînî nêbeno. Ma perû na dewa xo de bimanîme. Ma paştî bîdê jubînî, dewa xo ra dûrî nêvîndîme.”
