Sefîrîya Îsraîlî ya Fransa, roja îne beyanatêk dabî û vabî ke Îsraîl verê hêrişê Îranî, Fransa hîşyar nêkerdo, çimkî Îsraîl, Fransa sey verên mutefîkê xo nêvîneno.
Joshua Zarka ke Wezaretê Karanê Teberî yê Îsraîlî de verê cû, dosyaya Îranî de verpirsîyar bî, Radyoya RTL’î rê beyantê da û va ke sey verên Îsraîl û Frans yewbînan nêzd nîyê.
Îran: 6 merdimê ma yê pisporî hêrişan de cuya xo vîndî kerdê.
Medyaya Dewlet a Îranî agahî da ke hêrişê Îsraîlî de 6 merdimê pisporî cuya xo vîndî kerdê.
Umman: do bêîstîkrarî vila bibo
Dewleta Ummanî ke mabenê Îsraîl û Îranî de mabenkarî kerdêne, bertêk nîşanê Îsraîlî kerd û dîyar kerd ke no hêriş, îxlalê Pêameyîşê Neteweyanê Yewbînanî yo, bi no hêriş do herême de bêîstîkrarî vila bibo.
Suudî Erebistan: Ma şermezar kenê
Suudî Erebistan zî bertek nîşanê hêrişê Îsraîlî da û wina va: “Hêrişanê ke vera Komara Îslamî ya Îranî ke birayê ma yo, yenê kerdiş, ma qebul nêkenê û ma nê hêrişan şermezar kenê.”
Guterresî zî bertek nîşan da
Sekreterê Pêroyî yê Neteweyanê Yewbînanî Guterresî zî bertek nîşanê hêrişanê Îsraîlî da û destnîşan kerd ke ê hêrişanê Îsraîlî yê vera Îranî ra etiryenê, yew het ra zî mabenê DYA û Îranî de zî pêvînayîşê programê nukleerî domyeno.
Avustralya: Ma etiryenê
Dewleta Avustralya zî babete ser o va ke ê hêrişanê Îsraîlî yê vera Îranî etiryenê, xo ra Rojhilatê Mîyanênî bêîstîkrar o, bi nê hêrişan zî do hîna bêîstîkrar bibo.
Wezaretê Karanê Teberî yê Japonyayî Takeshi Iwaya zî îzeh kerd ke mabenê DYA û Îranî de pêvînayîşê programê nukleerî domyeno la belê heto bîn ra zî hêrişanê Îsraîlî yê vera Îranî rewşêka xemginî ya.
