Memed û Fadima Turane dewa Şampaşa ra ameyê dewa Mollakoye û nika qaytê naxire kenê. Bêrîya dewa xo verêne kenê vanê: “Weye kerdena malî û dewarî verênde rind bî, nika her çî pere ra vêreno.”
Memed Turan û hevala ey Fadima Turane, verî weşîye xo Dewa Dêrsimî Şampaşa de ramita. Nika dewa Erzinganî Mollakoye de manenê û goreyê îmkananê xo çend dawaran kene weye.
Memed û hevala ey Fadima, kar û barê xo ser ajansê ma rê qisey kerd.
‘Dewa verêne rind bîye, her çî bê pere bî’
Verî Mehmed Turan marê qisey keno: “Ma weşîya xo dewa Şampaşa de ramitêne. Dewarê ma bî. Pîyê mî, celebîyen kerdêne. Ma nûkî ramitêne, genim, cew, gurunga, perûne ramitêne. Ûsar şîyêne dewar. Amnon merge çînîtêne, Şûwane şîyêne celev, qatix dêne arê, karê dewa ma zaf bî. Dewa ma de cayê ma çinebî. Hewreş ame cîranê ma berd, bar kerdîme şîyayîme Erzîngan. Dewa verên de cîranîyên bî, jûminî de aşt bîme. Rindek, delal karê xo kerdêne. Îtîqatê ma bî. Nika waxt bîyo xiravin.”
‘Bîme kokim bese nekeme qayte dewar bikerîme’
Fadîma Turane hîna zê waxtê verî qatixê xo avrêncan de dana arê. Nê emre xo de hetê ra kebanîtîya keyeyî kena hetê ra zî karê dewarî hevalê xo Memedî de alikarîye kena. Fadima zî vayî bîyayena çî ra zîbena, na kokimîye de zorbîyayena karî ser vindene û wina vana: “Nika bîme kokim, karê dewarî ma rê giran yeno.
Her çî bi herînayîş ra beno. Qezencê nê karî çin o. Heşîrîye ma rê kar manena. Karê xo girano, sodîr sûnde zerê axure de gurînîme. Kîfatê xo ma rê zaf çin o. Ma zerê çeyî de tenayîme. Hîn kas beme some.”
