PÎRAN – Emser Kurdistan de zimistan û wisar hetê varanî de xurt vêrd ra. No semed ra wisarê emserî zî zaf xurt dest kerd ci. Her cayê Kurdistanî bîyo reng bi reng. Nê rengan ra yew zî Pîran o. Çend dimen û resmê ke rastê ma ameyî ma waşt ke şima de zî pare bikime.
Qezaya Amedî Pîran de wisar emser goreyê serranê verênan tayêna weş xo nîşan dano. Çike zimistan û wisarê emserî de vewre û varayiş zaf vara. No semed ra zî heme vaşan, gul û sosinan, dar û beran pelgê xo û çîcegê xo vera tîje kerdê a. Mêşê higimênî, kergî, golikî, mangayî, kutîkî û çi heybanê xoza estê pêro pîya vejîyê teber û tamê wisarî vejenê.
Heto bîn ra awê deranê Pîranî emser goreyê serranê bînan tayêna gimenê û bi coş vera menzîlê xo şonê.
