KESK, DÎSK, Hemserekê DEM Partî Bakirhan û Hatîmogullarî Serekê CHP’yî Ozgur Ozelî heqê karî yê asgarî ke 22 hezar û 104 TL bîyo rê reaksîyon nîşan û va ke no heq binê sinorê vêşanîye de yo û çend aşman de pêro beno vîndî.
Konfederasyonê Sendîkayanê Karkeranê Umûmîye (KESK) derheqê heqê karî yê asgarîyan yê 2025î de beyanatêk da. KESK bi nameyê “Ma heqê karêko însanî wazenê” beyanat da û va: Bi yew çekuye rezalet o. Ê ke heqê karî sey ‘xercî’ danê gedeyê xo, milyonan rê heqê karî yê 2025î 22 hezar û 104 TL kerdo.
‘Îttîfaqê Şerî heqê karî binê sinorê vêşanîye de vindarna’
KESK îfade kerd ke Îttîfaqê Şerî (Hukmat-IMF-Konfederasyonê Xebatkaran) heqê karî binê sinorê vêşanîye de vindarna. Beyanatî de ame vatene ke goreyê TUIK’î enflasyon %47, goreyê ENAG’î %86.76 û kanûne de kîrayan de %60.45 zêdeyî bîyo la heqê karî de tena %30 zêdeyî bîyo.
‘Goreyê TUIK’î zî no heq kêmî yo’
KESKî va ke eke goreyê hedefê hukmatî yo %45 enflasyon hesab bibo zî ganî heqê karî %12 zêde bibo û 23 hezar û 752 TL bibo. KESK’î va ke no heq nika zî 1 hezar û 648 TL kêmî yo û do çend aşman de pêro bibo vîndî.
DÎSK: Milyonî hîna feqîr bîyî
Konfederasyonê Sendîkayanê Karkeranê Şoreşgeran ê Tirkîya (DÎSK) va ke hukmat û sermaye reyna bi hawayêko yewcihete heqê karî tesbît kerdo û enflasyonê resmî ra zî kêmî zêdeyî kerdo. DÎSK’î beyanatê xo de wina va: No heqo ke ameyo tesbîtkerdene, karkeran ra zî nêameyo persayene. No heqê karî ke bêhukim o, sinifê karkeran do bi rêxistinbîyayîş û sendîkayan na dîktaya feqîrîye peyser bierzo.
Serekê CHPyî Ozgur Ozelî hesabê xo yê medya sosyalî ra va: No heqê karî ke bi kombîyayîşêka bi lez de ameyo tesbîtkerdene, nîşan dano ke Tayyîp Erdogan raştîya na welate ra dûrÎ kewto. Heqê karî aşma çeleyî ra nat enflasyonî ver 7 hezar TL şîyo û înan tena 5 hezar TL zêde kerdo. Ma vanî helal bo ê îdareyê TURK-IŞ’î ke nêşî na kombîyayîşî û ez veng dana sinifê karkeran ke wa hêzê xo yê berhemî bixebitnê.
DEM Partî: Heqê karî ganî bi rûmetê merdimî bibo
Hemserekê DEM Partî Tuncer Bakirhanî va: No heqê karî ke ameyo îlankerdiş, seba 2025’î muştulaya vêşanîye û feqîrîye ya. Hukmatê AKP’yî reyna dişmenîya xo ya karkeran nîşan da.
Bakirhanî wina dewam kerd: Na rewşe de ke kîrayî 20 hezar TL ra vêşêr ê û sinorê feqîrîye 70 hezar TL vîyarnayo, bacan ser %43.93 zêdeyî ameyo kerdene, no heqê karî nîşanê erjayîşê feqîrîye û vêşanîye yo ke hukmat dano şarî ser. Şarî rê ne qisey mendo ne zî hêzê pereşîyayîşê bazarî. Ma nê heqê karî red kenê û wazenê ke bi mîlyonan karker û ê ke hetê ked û cuye de yê pîya, heqê karî goreyê rûmetê merdimî bêro tesbîtkerdene.”
Hatîmogullarî zî Serekomar Erdoganî ra pers kerd “Şima vatêne ma do şarî xo hemverê enflasyonî maxdûr nêkerê. Şima yew roje zî nêeşkenê soz û qewlê xo de vindê?”
