Girewte Hayrettîn Adakî bi rayîrê keyeyê xo tedayê îdareyê Hepisxaneyê Samsunî îfade kerdê. Hayrettîn Adakî dîyar kerd ke îdareyê hepisxaneyî heqanê girewteyanê sîyasî asteng keno û vat: “Mabênê odayê girewteyanê sîyasî de girewteyanê edlî ronênê û girewteyanê sîyasî yewbînan ra dûrî fînenê.”
Hayrettîn Adak 2006î de Mersîn de amebi girewtene. 20 serrî yo girewte yo. Hepisxaneyê Kurkçuler ê Edene, Hepisxaneyê Kiriklarî yê Îzmîr, Hepisxaneyê Burhanîye yê Balikesîrî de girewte mendbi. Tewr peyên nika Hepisxaneyê Samsunî de yeno girewtene. Goreyê eşkerayîyanê girewteyî, îdareyê hepisxaneyê Samsunî girewteyanê sîyasî ser o zaf teda keno. Îdareyê Hepisxaneyî heqanê kultur û komelkî yê girewteyanê sîyasî asteng keno. Hewte de tena yew saete heqê sporî dana girewteyan. Îdareyê Hepisxaneyî, girewteyan odayanê ke dûrê yewbînan ê, ûca de ronena û destur nêdana ke girewteyî mektubanê xo yê vêşan yew zarfî de bierşawê. Wexto ke girewteyê sîyasî vera qeraranê îdareyê hepisxaneyî vejînê, îdare bahaneyê “Seba ke proses est o ma nêeşkenê çîyanê cîyayan awan bikerê” ano înan ver.
Girewte Hayrettîn Adakî bi rayîrê keyeyê xo tedayê Îdareyê Hepisxaneyê Samsunî îfade kerdê. Hemserekîya Federasyonê Komelanê Huqûq û Piştîpêdayîşî yê Keyeyanê Girewte û Hukimwerdoxan a Medî (MED TUHAD-FED) Kerem Canpolatî zî derheqê rewşa Hepisxaneyan de qisey kerd.
‘Destur nêdanê ke 2 mektuban ronê yew zarfî’
Hayrettîn Adakî dîyar kerd ke heqê mektubî yeno astengkerdene û vat: “Verê yew zarfe de zaf mektubî ameyêne erşawitene. Labelê ewro no heqê ma asteng kenê. Ma vera nê muracat kerd. Labelê astengî hema zî dewam kenê. Polîtîkayê îdareya Hepisxaneyî û hukmatî hema zî sey verî dewam kenê. Embazê ma wazenê ke odeya xo bivurnê labelê îdareyê hepisxaneyî destur nêdano. Verê vatêne ke ti eşkenî yew zarfe de çend kesan rê mektubî bierşawê. Labelê ewro destur nêdanê. Nêzdîbîyayîşê îdareya hepisxaneyî her ke şono hîna wişk beno.”
‘Girewteyan yewbînan ra dûrî kenê’
Hayrettîn Adakî îfade kerd ke wexto ke embazê înan şonê îdareyê hepisxaneyî reyde pêvînayîş kenê, înan nêdanê ronîştene û lingan ser o danê vindarnayene û wina qisey kerd: “Embazê ma zî vanê ‘ma lingan ser o pêvînayîş nêkenê.’ Seba ke embazê ma lingan ser o nêvinderê, nêeşkenê bi îdareyê hepisxaneyî reyde pêvînayîş bikerê. Îdareyê Hepisxaneyî vano ‘Wezaretê Edaletî telîmat dayo.’ Hepisxane de odayanê embazanê ma yewbînan ra dûrî kenê. Wexto ke ma vanê ‘ma wazenê bêrê têhet’ vanê, ‘destur çin o, şima do yewbînan ra dûrî bimanê.”
‘Cayê 6 kesan de 3 girewteyan verdanê’
Hayrettîn Adakî dîyar kerd ke heqê înan her roje yenê astengkerdene û wina dewam kerd: “Hepisxane de odayê cayê 6 kesan est ê. Labelê tena 3 kesan kenê yew ode. Wexto ke embazê ma vanê ‘Ma wazenê şîrê odayanê bînan’ vanê ‘tewr zaf 3 kesî eşkenê pîya bimanê.’ Labelê Wezaretê Edaletî zî eynî çîyan vano. Îdareyê Hepisxaneyî ma ra vano ‘proses est o coka ma nêeşkenê çîyanê cîya û neweyan awan bikerê.’ Çîyê cîya û neweyî çi yê ma nêzanê?”
‘Odayanê girewteyan yewbînan ra dûrî fînenê’
Hemserekê MED TUHAD-FED’î Kerem Canpolatî zî dîyar kerd ke nêzdîyê yew serrî yo ke prosesî dest pêkerdo labelê tedayê girewteyan ser o dewam kenê û wina qisey kerd: “Her ke şono tedayê îdareyanê hepisxaneyan zêdê benê. No tena polîtîkayê îdareyanê hepisxaneyan nîyo û no polîtîkayê dewlete yo. Heme hepisxaneyan de teda est a. Îdareyê hepisxaneyê Samsunî girewteyê sîyasîyan rê vano; ‘prosesî ra nêbo ma do tedayan hîna zêde bikerê.’ Îdareyê hepisxaneyê Xarpêtî zî eynî çîyan vano. Girewteyanê sîyasî yewbînan ra dûrî fînenê. Girewteyanê edlî mabênê odaya girewteyanê sîyasî de ronênê. Îdareyê hepisxaneyê Aksarayî vano ke, ‘proses mi eleqedar nêkeno.’ Proses bi qebulkerdişê dewlete dewam keno. Ma wazenê ke dewlet hetê Hepisxaneyan ra gamanê nerm bierza. Ma wazenê heme girewteyê sîyasî veradîyê.”
