Welatijê şaristanokê Dêrgule bi serran o kuncî ramenê û kenê tahîn. Eynê wextî de welatijî viraştişê tahînî zî bi hewayêko xozayî û arêyê awe de virazenê.
Pêroyê dinya û bi taybetî zî Tirkîya de teknolojîyê ramitişî her ke aver şono, kar û barê ramitişî yê ke bêyî teknolojî yenê kerdene, tepa manenê. Her çend qadê ramitişî de teknolojî serwext bo zî şaristanokê Dêrgule yê Şirnexî de welatijî ke karê ramitişî kenê û bi taybetî zî ramitişê kuncî kenê. Demê viraştişê tahînî de zî arêyê awe şuxulnenê. Welatijê ke kuncîyê xo erdî ra hewanenê û seba viraştişê tahînî amade kenê seba arêyê awe verê xo danê dewa Dûvyan a Şirnexî.
‘Ma seba xo virazenê, eke vêşî bibo ma roşenê’
Welatija bi nameyê Hurrîyet Benzer ke şaristanokê Dêrgule de manena û seba viraştişê tahînî ameya arêyê awe dîyar kerd ke heta ke ê kuncîyê xo seba viraştişê tahînî amade kenê, xeylê kede danê û wina vat: “Dima ke ma kuncîyê xo çînenê, qandê 3 aşman ma kede danê. Dima ma erdî ser o ra kuncîyanê xo arêdanê û ma anê kenê hişk. Ma dima bi mîrkutan kuncîyanê xo sipî kenê. Dima ke ma amade kenê na rey ma anê arê. Ma destpêkî seba xo virazenê eke vêşî bibo ma roşenê.”
‘Ma heme karanê xo pîya kenê’
Sultan Durak zî da zanayene ke ê heme karanê xo pîya, bi hewayêko hemkar kenê û wina qisey kerd: “Ma pîya ramitişê kuncîyanê xo kerd. Eynê wextî de ma pîya heme karanê amadekerdişê tahînî kenê. Na nika ameyê arê û tîya de zî ma hetkarîya yewbînan kenê. Ma seba werdê xo na zehmetîye ancenê. Demo ke vêşî bibo ma roşenê.”
Rojêk de 200-300 kîlo tahîn virazenê
Wayîrê arêyê awe Koçer Bayat ke 15 serrî yo dewa Duvyamî de arêwanî keno dîyar kerd ke ê aşma teşrîna peyêne de dest bi viraştişê tahînî kenê û wina vat: “Aşma teşrîna peyêne de ma dest bi viraştişê tahînî kenê. Heta aşma çeleyî dewam keno. Arêyê ma rojêk de qandê 200-300 kîlo tahîn virazeno. Dima ke karê viraştişê tahînî qedîyeno, ma ardî virazenê. Welatijê ke biwazzê ardî xozayê biherinê, xeleyê xo anê arê. Arê saetêk de nêzdîyê 200 kîlo ardî zî vejeno.”
Koçer Bayatî dîyar kerd ke ê sey heqê arê hem tahîn hem zî pere gênê û qiseykerdişê xo wina domna: “Welatijê ke biwazê ma sereyê 9 kîloyê tahînî kîloyêk tahîn înan ra gênê. Eke welatijî nêwazê tahîn bidê o wext seb a9 kîlo tahînî ma 400 TL pere gênê. Yanî tahînî çend bo ma hende pere gênê. Nika kîloyêk tahînê Dêrgule yê arêyî 400 TL yo.”
Seba arêyî elektîrîk lazim nîyo
Arêwan Koçer Bayat da zanayene ke xebitnayîşê arê de tena înan rê awe lazim a û vat: “Viraştişê arêyê ma bi temamî xozayî yo. Kerraya ke ma arê de şuxulnenê ma Koyê Cûdîyî ra arda. Sewbîna awa arêyê zî Cûdî ra yena. Ma kuncîyê xo kerra ser o sûr kenêç Tu wext ma rê elektîrîk lazim nîyo. Arêyê ma zî her tim xebitîyeno.
