Hemserekê Pêroyî yê DEM Partî Tulay Hatîmogullari û Tuncer Bakirhan derheqê enflasyon, rîskê jeopolîtîkan, alozîya borsaya Îstanbulî û vayîya sotemenîye de eşkerayîye daye û waşt ke derheqê nê babetan de Meclîs verê ke 1ê teşrîna verêne de abibo, kom bibo.
Hemserekê Pêroyî yê DEM Partî Tulay Hatîmogullari û Tuncer Bakirhan derheqê alozîya ke borsaya Îstanbulî de vejîyaya, vayîye û zemanê sotemenîye, rîskê jeopolîtîkan û enflasyono esteyî de yew eşkerayîyêka nuştekî daye.
Buroyê Çapemenîye ya DEM Partî eşkerayîye çapemenîye û raya pêroyî rê vila kerde. Eşkerayîye de ame dîyar kerdene ke vera na rewşe ganî Meclîs verê ke 1ê teşrîna verêne de abibo, kom bibo û nê babetan ser o munaqeşe bikero. Eşkerayîye de ame dîyar kerdene ke ganî îqtîdar vera vayîye û bêçareyîya hemwelatîyan, esnafan û pêro beşê komelî gaman bierzo.
Reyna eşkerayîye de ame dîyar kerdene ke ekonomîya Tirkîya wextêko derg o nêeşkena krîz ra vejîyo û na rewşe tesîrê rijayîşê komelî kena. Hemserekan eşkerayîye de dîqet ant alozîya borsaya Îstanbulî ser û eşkerayîye de wina ame vatene: “Nika ganî bêro perskerdene; Dezgehê kontrolî kamca de bîyê. Kaosê borsaya Îstanbulî zî mojneno ke bi mîlyonan hemwelatî mîyanê krîzêko zafhetî de yê. Yew hetê nê krîzî dizdî ya û dezgehê bêlîyaqet ê ke kontrol nêkenê û xirab-îdarekerdişê ekonomîye yo. Vera nê tabloyî de bi hawayêko berpirsîyar têgêrayîş tena wezîfeyê îqtîdarî nîyo, wezîfeyê Meclîs û dezgehê sîyasetî yo zî. Ma sey DEM Partî veng danê ganî Meclîs paweyê 1ê teşrîna verêne nêmano û bi hawayêko awarte kom bibo.”
