Hemserekanê DBP’yî Çîgdem Kiliçgun Uçar û Keskîn Bayindirî hesabê xo yê medya dîjîtal ser o seba sergêra dardekerdişê Şêx Seîd û embazanê ey mesajî dayî û wina vat: “Mîrasê înan zerrîya nê erdan de cuya xo domneno.”
Hemserekanê Partîya Herêman a Demokratîkan (DBP) Çîgdem Kiliçgun Uçar û Keskîn Bayindirî hesabê xo yê medya dîjîtal ser o seba sergêra dardekerdişê Şêx Seîd û embazanê ey mesajî pare kerdî.
Mesajê Hemsereka Pêroyî ya DBP’yî Çîgdem Kiliçgun Uçar wina yo: “Dardekerdişê Şêx Seîd û 46 hembazanê ey ser o 101 serrî derbas bîyî; mîrasê înan zerrîya nê erdan de cuya xo domneno. Dardekerdişê Şêx Seîd û embazanê ey eynî wextî de destpêkê polîtîkayanê îmha û înkarê seserrî yo ke ziwanê komelî, kultur û îradeyê kolektîfî hedef gêno. Ez vernîya vîrameyîşanê înan de ebe rêzdarî û hesrete vileyê xo çewt kena.”
‘Ê sey pêşenganê nemiran kewtî tarîxê şarê Kurdî’
Mesajê Hemserekê Pêroyî yê DBP’yî Keskîn Bayindîrî zî wina yo: “Ez Şêx Seîd û embazanê ey ê ke vera fehmê yewperest û înkarî bi ruhêko xoverdayox vindertî û sey pêşenganê nemiran kewtî tarixê şarê Kurdî, reyna bi rêz û minet ana xo vîr.
Sebebê ke Şêx Seîd û embazê ey berdî dardekerdiş, referansê bingehîn ê awankerdişê dewrê aştî û demokratîk ê ke ma ewro têkoşînê ci kenî. Labelê vera sîyasetê înkar û yewperestî wayîrvejîyayîşê têkoşînê çareserîya na seserre, wezîfeyêko tarixî yo. Rayîrê serkewtişê nê têkoşînî yo sereke zî; awankerdişê Yewîya Neteweyî ya Kurdan o û averberdişê sîyasetê demokratîkî yo. Bi nê hawayî ma eşkenî mîrasê Şêx Seîdan rê wayîr vejîyê û xeyalanê înan bîyarî ca. Bi rêz û minet…”
