Hemsereka Pêroyî ya DEM Partî Tullay Hatimogullari vat ganî komîsyon raporê xo helêke cuwa ver eşkera bikero, Serekê Pêroyî yê Partîya Gelecekî Ahmet Davutogluyî zî bale ante muhîmîya stratejîya haştîye ya bi hîrê ligan ser.
Hemserekê Pêroyî yê DEM Partî Tulay Hatimogullari û Tuncer Bakirhanî û Serekê Pêroyî yê Partîya Gelecekî Ahmet Davutogluyî badê kombîyayîşê bi rojdemê Rojawanî eşkerayîya çapemenîye daye.
Tulaye Hatimogullari derheqê zîyaretê xo yê Qamişloyê Rojavnaî de zanayîş da û vat ê peymana ke 30ê çeleyî de mabênê îdareyê Şamî û HSD’yî de ameye kerdene pozîtîf vînenê. Hatimogullari ard ziwan ke peymane semedê heme şaran ke Sûrîye de ciwîyenê do verê prosesê haştîye abikero û vat ganî Tirkîya zî paştî bido na peymane û hukmat ziwanê xo yê negatîfî caverdo.
Tulay Hatimogullari vat ganî Berê Sinorî yê Murşitpinarî bêro akerdene ke hetkarîya merdimî bireso Kobanê. Hatimogullari ard ziwan ke ganî gamê pêtî bêrê eştene û vat ganî komîsyonê meclîsî ke çarçeweya Prosesê Haştîye û Komelê Demokratîkî ame ronaye, hinî raporê xo eşkera bikero. Hatimogullari veng da ke wa caardişê qeyûmî bêro wedaritene, tepişteyê nêweş û sîyasîyî serbest bêrê veradayene.
Ahmet Davutogluyî zî bale ante pêkewtişanê ke herême de zêdîye û vat ziwanê pêkerdişî yê sîyasetî hewce keno. Davutogluyî ard ziwan ke sey Tirkîya, Iraq û Sûrîye hîrê lingê prosesê haştîye est ê û vat ganî bawerîya şaran yewbînan rê bibo. Davutogluyî ard ziwan ke qederê şaranê tirk, kurd û ereban hempar o û vat: “Cehdkerdişê pêverdayîşê şaran zirar dano her kesî. Pêkewtişan ra têna hêzê emparyalîstî feyde kenê.”
