Hemsereka Pêroyî ya DEM Partî Tulay Hatîmogullari vat ke bi taloqkerdişê prosesî vernîya provokasyonan abena: “Birêz Ocalan vano ganî gamî lez bêrê eştene. Têhetameyîşê peyênî de zî eşkera yo ke sistbîyayîşê prosesî bale birêz Ocalanî zî anta û o vano ganî no bêro vîyarnayene û bilez gamî bêrê eştene.”
Prosesê Haştî û Komelê Demokratîkî badê tesdîqkerdişê qanûnê çarçewa yê Meclîsî pawitişê tatbîqkerdişê qanûnî de yo; qanûn badê raporê tesbît û teyîdî yê MGKyî keweno meriyetî. Konseya Taqîbkerdiş û Tesbîtî ke bi serekîya Hetkarê Serokkomarî Cevdet Yilmazî ameye awankerdene, kombîyayîşê xo yo verên 24ê tebaxe de viraşt û 4 binkonseyî ameyî awankerdene; goreyê Heyetê Îmraliyî yê DEM Partî Rayberê Şarê Kurdî Abdullah Ocalan do Binkonseya Koordînasyonê Bêçekkerdiş û Stratejî de ca bigîro. Badê kombîyayîşê verênî tu xebate nêameya kerdene. Badê akerdişê Meclîsî yê 1ê teşrîna verêne yeno pawitene ke Konseya Çimderîye bi beşdarîya partîyanê Meclîsî bêro awankerdene û kombîyayîşê MGKyî zî bêro viraştene.
Hatîmogullariye ke persanê Ajansa Welat cewab dayî, vat ke DEM Partî kongreyê xo yê 5. de demê newe sey awankerdişê Komara Demokratîke dîyar kerd û ê do programê Komara Demokratîke bi modelêkê hereket û rêxistinbîyayîşî pêt bikerê: “Awanbîyayîşê komare nê cografya de tarîxî yo, la seba demokratîkbîyayîşî kêmanîyê aye yê girdî est ê; seserra komare de netewe û bawerîyê cîyayî çin ameyî hesibnayene, qetlîam û darbeyî bîyî û ewro zî tatbîqatê sey qeyûman dewam kenê. Komara Demokratîke yena a mana ke îdareyê herêmkî xo bi xo îdare kenê û girêdayeyê merkezî nîyê; qanûndanîş, dadgeh û îdare yewbînan ra cîya benê; heqê xoza û merdiman, azadîya cinîyan yenê pawitene û meseleya kurdan bi temamî çareser bena – ne tena bi qedîyayîşê şerî, bi heqê perwerdeyê bi ziwanê dayike zî. Komara Demokratîke rayîrê ke şino sosyalîzmî awan kena.”
Hatîmogullariye vat ke 4 binkonseyî hema nêameyî awankerdene û dest bi xebate nêkerdo; no kêmanî yo: “Qanûn hema pratîk de nîyo, paweyê tesbît û teyîdî yo. Seba ke endamê rêxistine ke çekî ronayî û surgunîyî bieşkê bêrê û tepişteyê sîyasî bêrê veradayene, ganî qanûnê çarçewa bikewo meriyetî; ganî MGK bilez raporî amade bikero. Eke rapor nêbo, komel de endîşeyê ke proses vindert virazîyenê.” Derheqê munaqeşeya keyeyê Girawa Îmraliyî de aye vat ke mesele keye û çar dêsî nîyê, viraştişê şertanê xebata azade ya birêz Ocalanî yo: “Ganî rojnameger, huqûqnas, hunermend û sîyasetmedarî bieşkê şêrê. Sînordarkerdişê babetêka hende muhîme bi keyeyêk zaf xelet o û tesîrêko negatîf prosesî ser o keno; ganî na babete bi cidîyetêka sîyasî bêro girewtene, bi hawayo magazînî ney.”
Hatîmogullariye vat ke Konseya Çimderîye ya Meclîsî de ganî heme partîyê sîyasî temsîl bibê, çunke haştîya komelkî wezîfeyê heme partîyan a û bê DEM Partî tu partî prosesî bi hawayo têr û tijî girseya xo rê nêvato: “Badê qanûnê çarçewa babeta sereke qanûnê demokratîkbîyayîşî yê û no wezîfeyê Meclîsî yo.” Derheqê têhetameyîşê peyênî de aye vat ke birêz Ocalanî nirxnayîşêko hîra kerdo, prosesî sey caardişê berpirsîyarîyanê tarîxîyan vîneno û vano gamî ganî lez û pîya bêrê eştene: “Ocalan eşkeno seba averşîyayîşê prosesî zaf çîyan bikero, la mabênê çar dêsan de û bi têkilîyêka sînordare no mumkun nîyo. Serokkomarî zî bale anta ke proses ganî derg nêbo; la ez ey ra persena: dewlete şima îdare kenê, ê ke prosesî lez kenê şima bi xo yê. Tîya de çîyo muhîm wêrekî û qerardarîya îqtîdarî yo.”
Hatîmogullariye peynî de vat ke ganî bilez dest bi qanûnanê demokratîkan bêro kerdene û berpirsîyarî ya îqtîdarî ya; sansurê medyaya dîjîtale, destbendkerdişê rojnameger û endamanê partîyanê sosyalîstan û hêrişê vera LGBT+yan çîyê rejîmanê otorîteran ê: “Wexto ke wina beno, bawerîya komelî ya haştîye aver nêşina. Ganî destbendkerdiş û zextê ser o muxalefetî bilez bêrê vindarnayene û komel boya xo bigîro. Verê ganî tatbîqatê vera demokrasîye biqedîyê, dima behsê gamanê demokratîkan bêro kerdene; no hem seba aramîya komelî hem zî seba Prosesê Haştî û Komelê Demokratîkî hewceyêk o.”
