Hemsereka Pêroyî ya DEM Partî Tulay Hatîmogûllarî kombîyayîşê grûba partîya xo de eşkera kerd ke bi mîlyonan ameyî qadan û mesajê aşîtî û demokrasî ard ziwan.
Hemsereka Pêroyî ya Partîya Têduştî û Demokrasîyî ya Şaran (DEM Partî) Tulay Hatîmogûllarî Meclîsî de kombîyayîşê grûba partîya xo de babetê rojeve erjnayê. Tulay Hatîmogûllarî ard ziwan ke bi mîlyonan qadan de vengdayîşo seserre rê wayîr vejîyayî û waştî ke rayîrê aşitî akerê û wina va: “Qadan de bi mîlyonan kedkar, cinî û ciwanî est bî. Ez silamanê xo înan rê erşawena. Tarîxê Tirkîya de Newroza 2025î Newroza ke tewr zaf kesî beşdarî ci bîyê, ameye kerdene. Mesajê ke ameyê dayene zaf muhîm û bi mana bîyê. Na Newroze de hêvî û bawerî zêdîyaye. Na Newroze de waştişê demokrasî û edaletî vejîya vernî. Newroza 2025î de şar dorûdorê adirê Newroze de aşitî rê wayîr vejîya. Dayîkî bi kinc û kitananê xo yê sipîyan vejîyayî qadan û aşitî rê wayîr vejîyayî.”
Tulay Hatîmogûllarî ard ziwan ke na Newroze bîye sembolê qerar, îrade û têkoşînê bêvindertîşî û wina va: “Na Newroze bîye sembola têkoşînê tarîxî. Na Newroze de mîlyonî ameyî qadan. Mîlyonan mesajê xo zelal ardî ziwan. Mesajê hempar yê mîlyonan est bîyê. Şaran dîyar kerd ê badê mesajê seserre yê Rayberê Şarê Kurdî Abdullah Ocalanî piştî danê aşitî û demokrasî û piştî danê mesajê seserre yê Rayberê Şarê Kurdî Abdullah Ocalanî de yê. Vatî waştişê Abdullah Ocalanî, waştişê înan o. Na Newroze de waştişê mîlyonan bi yew vengî vejîya orte. Kesê ke goş û çimanê xo nê vengdayîş û waştişê şarê kurdî rê padê, do zaf gird vîndî bikerê.”
