Unvanê berzîye yê Gola Masîyan ke Bazîd de bi 2 hezar û 241 metreyan goleta tewr berz a, rê reqîbêk vejîya. Teqez bi ke goleta cemede ya Gola Etarî ke Avkevir de ca gêna û teberê şênîyanê herême de zaf nêna zanayene, 2 hezar û 850 metre berz a.
Goreyê qeydanê resmîyan ê Tirkîya, îstatîskê berze yê golan de goleta tewr berz Gola Masîyan a ke qezaya Bazîdî ya Agirî de ya û berzîya ci 2 hezar û 241 metreyî ya. La ame tesbîtkerdene ke Gola Etarî ya ke qezaya Avkevirî de ya û hetê şarê herême ra qeyr zaf nêna zanayene, 2 hezar û 850 metre berz a. Na rewşe bi cigêrayîşanê ekîbêkê Unîversîteyê Agirî yê Îbrahîm Çeçenî ameye tesbîtkerdene. Pawîyeno ke ekîb, vînenayîşanê xo yê netîceyê cigêrayîşan, wextêko nêzdî de meqaleyêka ke do sero amade bikerê de biweşanê.
Goreyê xebera MA’yî Gola Etarî ke Agirî ra 64, Avkevir ra 32 kîlometre dûrî ya, dima ke ameye keşfkerdene, pawîyena ke sey goleta tewr berz a Tirkîya û Kurdîstanî bêra tescîlkerdene. Gola Etarî ke binê Lûtkeya Koçbaşî ya ke 3 hezar û 510 metre berz a û noqtaya tewr berz a sîlsîleya Koyanê Aladagî ya ke sînorê qezayanê Avkevirî û Erdîşî ya Wanî de ya, de ca gena, bi 2 hezar û 850 metre berzîya xo ya, pozîsyonê goleta tewr berz a Tirkîya û Kurdîstanî de ya. Seba ke merdim bireso goleta Gola Etarî ya ke erdêke yo nêzdîyê 50 hektarî ser o ya, heta dewa Azî ya ke merkezê qeza ra 22 kîlometre dûrî ya, rayîrê wesayîtan est o, la ganî qasê 10 kîlometreyan zî bi payan bêro şîyene.
Seba ke bikero lîteratur, pawîyena ke bêra tescîlkerdene
Goreyê qeydanê resmîyan ê Tirkîya, polenkerdişê golan de goleta tewr berz Gola Masîyan (Gola Maseyan) a ke qezaya Bazîdî de ca gena û 2 hezar û 241 metre berz a. Bi rastkerdişê na kêmasîya malumatî bi xebatanê tescîlî yê ke do bêrê viraştene, Gola Etarî pawîyena ke sey goleta cemede ya tewr berz a Tirkîya bikewo lîteratur.
