Stenbol – Girewteyo sîyasî Gurkan Turkoglu ke 3 aşmî yo ke nêweşxane de ameyni dermankerdene, cuya xo ra bî. Gurkan Turkoglu vera tecrîd û hepîsxaneyê sey ‘tîpê Bîrî’ 266 rojî kewtibi grevê vêşanîye.
Girewteyê bi nameyê Tahsîn Sagaltici, Gurkan Turkoglu û Huseyîn Ozen ke Hepîsxaneyê Ewleyîya Berz ê Anatalya de vera tecrîd û hepîsxaneyê ke sey ‘bîrî’ yenê pênasekerdene, tîpê YGC, Y û S’yî de xo ver dayê. Tahsîn Sagaltici û Gurkan Turkoglu 266 rojî û Huseyîn Ozen ke 57 serre yo zî 247 rojî kewtê grevê vêşanîye. Badê 21ê nîsane waştişê înan ameyê qebulkerdiş û înan dest çalakîya grevê vêşanîye ra fek verada.
Gurkan Turkoglu 3 aşmî yo ke Nêweşxaneyê Şaristanî ê Antalya de rewşa îstîsnayî de ameyene dermankerdiş. Rewşa Gurkan Turkoglu vizêrî giran bî û rayberîya hepîsxaneyî, keyeyê Gurkan Turkoglu gêrabî û vatbî, “bêrê rewşa lajê şima baş nîya, şima eşkenê ey bivînê.”
Buroyê Huqûqî ê Şarî medyaya dîjîtale ser o eşkerayîye da û wina vat: “Muwekîlê ma Gurkan Turkoglu cuya xo ra bî. Hepîsxaneyê ‘Bîrî’ ganêko bin zî berd. Proses bi mudaxeleyêko zorî ame na rewşe. Kiştoxê Gurkan Turkoglu, Wezaretê Edaletî, Wezaretê Weşîye û îqtîdaro ke hepîsxaneyê ‘Bîrî’ awan kerdê. Gurkan Turkoglu bêmerg o.”
