Parlamenterê DEM Partî Omer Ocalanî vera hêrişanê ke Tişrînî ser o bîyê reaksîyon mojna û wina vato: “Rojava de merdimî yenê kiştene. Ganî hêrişî ca de bêrê vindarnayene û seba çareserîya demokratîke gamî bêrê eştene.”
Rêxistinê DEM Partî û DBP’yî yê Rihayî û aktîvîstê TJA’yî vera hêrişanê dewleta tirke û grûba aye ya paramîlîter SMO’yî ke Vakur û Rojhelatê Surîye ser o yê reaksîyon mojna. Vera rêxistina DEM Partî ya Rihayî de beyanat ame dayene. Parlamenterê Rihayî Omer Ocalan û Ferît Şenyaşar, Hemverfeka Komîsyonê Huqûqî ya DEM Partî Sevda Çelîk Ozbîngol, endamê Meclîsa Dayîkanê Aştî ya Rihayî, endamê Platforma Ked û Demokrasî ya Rihayî û zaf kesî beşdar bîyî. Beyanatî de pankarta “Rojava xeta ma ya sûr a” û sloganê “Biciwîyo Xoverdayîşê Rojava” û “Rojava rûmetê ma yo” ameyî eştene.
Omer Ocalanî ke beyanat de qisey kerd, bale ant sîvîlê ke Awbendê Tişrînî de ameyê kiştene û wina vat: “Nê rojî, rojê tarîxî yê. Ma eşkenê aştîyêka birûmete bîyarê meydan û nê şerî rê bibê çareserî. Tişrîn de rojnameger, sîyasetmedar, sîvîl, gede û wendoxê unîversîte yenê bombebarankerdene. No şer zerar dano aştî. Ganî ca de bêrê vindarnayene. Tişrîn seba ma cayê rûmetî yo. Ma herra kesî dagir nêkerda. Destê aştî Rojava rê derg bikerê. No şar heqê aştî gêno.”
‘Rêzdar Ocalan rolê xo kay keno’
Ocalan dewamê qiseykerdişê xo de bale ant têhetameyîşê Heyetê Îmralî yê ke Serekê PKK’yî Abdullah Ocalanî reyde bîyê û wina dewam kerd: “Prosesêk est o û rêzdar Ocalan rolê xo kay keno. DEM Partî piştî dana. Ganî problemê kurdî bi rayiranê demokratîkan çareser bibo. Kiştişê way û birayê ma yê Rojava zerar dano ma pêrunan rê. Çareserî wina nêbena. Rojava de merdimî yenê kiştene û Tirkîya de rojnamegerî yenê tepiştiş. Ganî her kes rîyê xo bido Rojava. Ma wazenê na seserre de seypê biciwîyê. Paradîgmaya rêzdar Ocalanî eşkena seba Rojhelatê Mîyanênî biba model. Rêzdar Ocalan seba çareserîya demokratîke cehd keno û ganî merdim destê ey xurt biko. Şarê kurdî qebul nêkeno ke way û birayê înan bi destê çeteyan bêrê kiştene. Seba çareserî û aştî zerrîpak bibê. Hetêk de aştî hetêk de qirkerdiş nêbeno. Ma seba aştî amade yê, ma şerî rê vanê ney. Seba çareserîya birûmete çîyo ke destê ma ra yeno ma do bikerê. No nêyeno na mana ke ma xizmetkarîye qebul kenê.”
‘Cuya Rojava ya newîye seba heme şaran hêvî ya’
Ocalanî ard ziwan ke ganî kurdî yewîya xo ya neteweyî bîyarê meydan û qiseykerdişê xo wina qedêna: “Ganî sîyasetmedarê kurdî her ca de bêrê têhet û piştî bidê Rojava. Cuya Vakur û Rojhelatê Surîye ya newîye, seba heme şaran hêvî ya. Ma piştî danê. Ma hêrişê ke Tişrînî ser o benê şermezar kenê. Ganî nê hêrişî ca de bêrê vindarnayene û seba çareserîya demokratîke gamî bêrê eştene. Ma tîya ra silamanê xo ruşnenê kesê ke herre û awa xo pawenê û nobete gênê.”
Beyanat bi çepikan qedîya.
