Hemserekê OHD’yî yê Êlihî Mizgîn Argiş û Sefa Sormazî vat ke dewleta tirkan Heqê Hêvî bi hewayêko sîyasî erjnena û dîyar kerd ke goreyê qeraranê DMME’yî ganî bêşert û merc bêro caardene.
Avûkatanê Ocalanî 2003î de seba Heqê Hêvî muracatê DMME’yî kerdbi. DMME’yî 18ê adara 2014î de qerar dabî ke Tirkîya ganî nê heqî bîyara ca. 12 serrî vîyartî la Tirkîya hema zî nê qerarî nêardo ca. Serekê MHP’yî Bahçelîyî zî waştbi ke no heq bêro caardene la tu gamê şênberî nêameyê eştene.
Mizgîne Argiş vat: “DMME bi hewayêko zelal vana, ‘Tu kes nêeşkeno heta peynîya emrê xo girewtw bimano.’ Seba ke Abdullah Ocalan Hepisxaneyê Îmraliyî de tena maneno, DMME no sey binpaykerdiş pênase kena. Heqê Hêvî vatişêka waştişî nîyo heqêko mîyanneteweyî yo. Birêz Ocalan kesêko rêzî ra nîyo, temsîlîyetê şarê kurdî yo.”
Sefa Sormazî vat: “Dewleta tirkan nê heqî pêro sey qanûnêka huqûqî nêerjnena. Hîna zaf sey qadêka manevrayî ya sîyasî vînena. Her wext ke dewlete bikewê tengane, azadîya Ocalanî gêna dest. Wexto ke ziwan tûj bo, negatîf qisey kenê. Eşkerayîya Bahçelîyî ra çend roj ver, dewlete Vakur û Rojhelatê Sûrîye de manevra kerdêne û no heq rojevê ra hewanabi. Wexto ke qerarê mabênê HSD û Hukmatê Demkî kewtî medya, newe ra Heqê Hêvî eşt rojevê.”
