Hemseraka Konfederasyonê Komela Elewiyan a Ewropa Nevîn Kamîlagaoglîye vengdayîşê Aştî û Komela Demokratîke seba komela Elewîyan da zanayene ke a bi xo sey “omid dayîye” vênena. Va “Elewî ganî nê prosesê neweyî de rolêka aktîfe kayî bikê.”
Hemseraka Konfederasyonê Komela Elewiyan a Ewropa (AABK) Nevîn Kamîlagaoglîye PÎRHA’re qisey kerd va: “Ganî rêxistin û sazîyê Elewîyan nê prosesî de zê sêrkerdox û waştoxanê xo vatîş nê, zê aktorêke sereke mîyanê nê prosesî de cayê xo bigê. Mineqaşayanê qanûnê bingeyînî de zî ca bigê û seba ke xo vera demokrasî vurnayîşê Tirkîya de rolêka xurte bîyarê ca.”
Vengdayîşê Rayberê Şarê Kurdî Abdullah Ocalanî yê “Aştî û Komela Demokratîke” ser PKK Kongreya 12. de bira çek veradayene girewte. Nê gaman ra dima Tirkîya de eyanê de nerm virazîya û omidê şaran û olan kewe bî. Hetê partîyanê siyasîyan û komeleyanê tirkîya de zî no proses bi şiklêko rind û çareserkerde ame dîyayene.
La belê he ne hetê partîyê ke hukmatî rayera benê ne zî hetê partîyê ke muxalefet de rê gamê henî asayî nêyameyê eştene. Ganî seba çareserîye meclîste yew komîsyon bîyamêne awankerdene o zî hîna serê fekî de mendeyo.
‘Proseso newe omid dano Elewîyan’
Proseso newe de komela Elewîyan sey aktorêka sereke yena nîşandayene. Komel û rêxistinanê Elewîyan no proseso newe seba şaran û olan ca de dî û rind ercna. Hemseraka Konfederasyonê Komela Elewiyan a Ewropa Nevîn Kamîlagaoglîye vengdayîşê Aştî û Komela Demokratîke seba komela Elewîyan da zanayene a bi xo sey “omid dayîye” vênena.
Kamîlagaoglîye “Ganî rêxistin û sazîyê Elewîyan nê prosesî de zê sêrkerdox û waştoxanê xo vatîş nê, zê aktorêke sereke mîyanê nê prosesî de cayê xo bigê. Mineqaşayanê qanûnê bingeyînî de zî ca bigê û seba ke xo vera demokrasî vurnayîşê Tirkîya de rolêka xurte bîyarê ca.”
‘Seba ma aştî tena çek veradayene nîya’
Kamîlagaoglîye hetê ra omidê xo hetê ra zî vera dewleta tirke şik û gumanê xo dîyar kerdî. Tarixa Elewiyan de zaf qirkerdîşî, tada û zilmî estê. Elewî nîyamê naskerdene, bawerîya înan ama înkarkerdene û zulm bîyo piro. Ayera bi temkîn nêzikê dewletan benê. Wina vana: “Seba ma teyna çek veradayene aştî nîya, tesîskerdena edeletê komelano, têduştîya welatijana, azadbîyayena ziwanê dayîke û azadbîyayena olan, bawerîyan naskerdena. Elewi wazenê ke vera demokratîkbîyayene vurîyayîşêko kur bêro ca ardene û no zî qanûnanê bingehînan de ca bigo. Dewlete mesafeyê xo û şaran, ziwanan, olan û bawerîyan vîndî meko, het mego. Dersê dînî yê zorekî ravazê. Elewîtîye sey bawerîyêka, olêka cîyaye bero naskerdene û bi serê nameyê dînanê bînan ser nêro asîmilekerdene.”
Weşîya Elewîyan girêdayîyê demokrasîya
Kamîlagaoglîye vana: “Seba Elewîyan ameyîşê demokrasî teyna raye dayene û sandiqan ser şîyayene nîya.” Wina domnena: Demokratîkbîyayena rastîye awa ke azadîya olan-bawerîyan, azadîya şaran û ziwanan, azadîya heqanê kultirîyan, karkeran, rojnamegeran bi qanûnan bêro qorî kerdene.
Elewî endî neheqîye û zilm vênîtene nêwazenê, îtîqat û kultîrê xo de azad ciwîyayene vazenê. No semed ra zî demokrasî sebe her kesî muhîm o hema seba Elewîyan heyatî yo. Ganî rêxistin û komelê Elewîyan nê prosesî rast fam bikerê û rastîye berê komela Elewîyan rê. Seba ke no proses serê xeta heqîqete ra şoro sare o wext ganî komel û rêxistinê Elewîyan zereyê Tirkîya û teberê Tirkîya de karê de giran bigê serê milê xo. Vengdayîşê Aştî û Komela Demokratîke ra wayîr vejîyê.”
