Colemêrg – Temsîlkarê MEBYA-DER’î yê Colemêrgî Hamdî Taşkin derheqê prosesê “Aştî û Komelê Demokratîk” de qîsey kerd. Hamdî Taşkin dîyar kerd ke wexto aştîyêke vîrazêna çek ronayîş dima ra yeno caardene la Rayberê Şarê Kurdî Abdullah Ocalan sere de na game eşte û vat: “Rixmê na game de zî dewlete tu game nêeşta.” Hemsereka DEM Partî ya Colemêrgî Remziye Akdogan zî vat ke ganî azadîya fîzîkî ya Abdullah Ocalanî bêro garantîkerdene.
Bi vengdayîşê Rayberê Şarê Kurdî Abdullah Ocalanî ê 27ê sibata 2025î, prosesê “Aştî û komelê Demokratîk” ame dest pêkerdene û çarçewaya prosesî de Têgêrayîşê Azadîye ewilî kongreya xo kom kerde û xo fesîh kerd. Dima ra 11ê temmuza 2025î de bi merasimêk çekê xo veşnayê û tewr peynî de zî gerîla vakurî ra ancîya. Rîxmê nê gamanê girdan, dewlete tu gamî şênberî nêeştê û na rewşe mîyanê sazgehanê demokratîkan de yena muneqeşekerdene.
‘Çîyêko kurdî wazenê nêameyo caardene’
Temsîlkarê MEBYA-DER’î yê Colemêrgî Hamdî Taşkin derheqê prosesî de dîyar kerd ke dewlete her tim vatêne, hetanî şer bibo gamê demokratîk nênê eştene; la Rayberê Şarî Kurdî, no sebebo lazim dewlete ra girewt. Hamdî Taşkin vat ke Rayberê Şarê Kurdî gama ke gere peynîyê prosesî de bêro eştene, sere de eşte û qîseykerdişê xo wina domna: “Wexto ke aştîyêke vîrazêna çek ronayîş dima ra yeno caardene la Serekî sere de na game eşte, çekî ameyê vêşnayene û PKK’yî xo fesih kerd. Serekî sebebê maneyan ê dewlete werte ra wedarna û firsendêke da dewlete. Çi heyf ke dewelete rixmê nê çîyan hema zî tu gamêk nêeşta û çîyêke kurdî wazenê canêardo.”
‘No proses poşmanîye ser o dest pênêkerdo’
Hamdî Taşkin dîyar kerd ke Têgêrayîşê Azadîye û DEM Partî zî ard ziwan ke êdî apey de gam eştiş mumkun nîyo, prosesê demokratîkbîyayîşî de çi lazim keno, ganî bêro caardene. Hamdî Taşkin seba averşîyayîşê prosesî îfade kerd ke ganî îmkanê Rayberê Şarê Kurdî bêrê başkerdene û wina dewam kerd: “Ganî seba embazê ma yê ke zîndanan de yê gamî bêrê eştiş. Nika qalê qanûnê poşmanîye kenê; la seke embazanê ma zî vat, no proses waştişê poşmanîye ser o dest pênêkerdo. Seba rûmet û heqanê bingeyîyan dest pêkerdo. Eke ma û şima vanê ma way û birayê ganî ferq û cîyayî na way û birayîye de çin bo. Ê wayîrî kamcî heqanê, kurdî zî wayîrê eynî heqan bê. O wext ma do bizane ke ma way û birayê yewbînanê.”
‘Ganî verê tehtîlî de qanûnî bêrê viraştene’
Hamdî Taşkin îfade kerd ke ganî verê ke meclîs bikewo betlane, qanûnî bêrê viraştiş û vat: “Şarê ma vano ke heta nika heme hetan ra înan fedekarî kerda û heme gamê lazimî eştê, heme rayîrê way û birayîye akerdê; la dewlete sekena, çi gamî eştê? Ma na hêvîye de yê ke verê ke meclîs bikewo betlaneyî gamî bêrê eştene. Kurd her wext hedre yo, no têkoşîn û xoverdayîş her wext gird beno. Peynîye de do kurd bireso heqanê xo.”
‘Ganî astengîyê ke vernîya ma de yê wedarê’
Hamdî Taşkin dîyar kerd ke ê sey sazgehanê demokratîk seba her çî hedre yê û qiseyê xo wina qedêna: “Ganî astengîyê ke vernîya ma de ameyê ronayîş, bêrê wedaritiş. Nimûne; ma wazenê ziwanê xo de perwerdeyî bivînê û bi nasnameyê xo biciwîyê. Nê astegîyê û ganî werte wedarî; la hema zî zextê ke nê semedî ra kurdan ser o yê dewam kenê û xeylî kesî nê semedî ra raştê cipersayîşî yenê. 50 serrrî yo ke vernîya ma de bi no hawa astengîyê girdî bîyî. Hêvîya ma tu wext nêqedîyaya, hêvîya ma şarê û hêzê ma ra yena. Ma bawerê ke ma do bi resi heqanê xo.”
‘Azadîya Serekî azadîya ma ya’
Hemserka DEM Partî ya Colemêrgî Remziye Akdogan zî bale ante azadîya Rayberê Şarê Kurdî Abdullah Ocalanî ser û wina vat: “Serrêk û nêm o ke proses esto, ma gaman erzenê; la Erdogan hema zî gamî nêeştê. Hema zî embazê ma zinadan de yê û ê nêweşî nênê veradayene. Ma aştîye wazenê ke ne dayîkê gerîla ne zî dayîkê leşkeran nêbermê. Hetanî Serekê ma azad nêbo, ma zî azad nêbenê. Azadîya Serekî azadîya ma ya.”
