Fîlozof-sosyolog John Holloway bi munasebetê serrgêra vengdayîşê 27ê sibate erjnayîşê xo pare kerdî û vat ke azadîya Rayberê Şarê Kurd Abdullah Ocalanî hem seba hewanayîşê bêedaletîyêka girde hem zî seba akerdişê rayîrê prosesê pêameyîşê demokratîkî hayatî ya.
Hollowayî vat: “Bes o hende şer bî, bes o hende zordayîş û teda est bî. Hewcedarîya pêameyîşî est a ke kultur, adet û grûbê komelkîyan ê cîya-cîyayan bişinasnê û qebul bikerê. Azadîya Ocalanî nê prosesî de bena gamêka zaf muhîme.”
Fîlozof Hollowayî ajansê ANF’yî rê qiseykerdişê xo de dîyar kerd ke Meksîka de eserê Ocalanî newe-newe yenê wendene û zaf yenê munaqeşakerdene: “Fikrê ci seba viraştişê prosesêk ke pêşinasnayîşî ser o bo, raşta zî binge virazeno.”
Hollowayî îfade kerd: “Ocalan derheqê pîyaciwîyayîşî de formêko tamamen cîya yê fikrkerdişî rêr rayîr akeno” û vat ke eke dewleta tirke têkoşînê kurdan bişinasna û waştişê hemwelatîya seypê û otonomîye qebul bikera no beno vurîyayîşêko demokratîk û gird.
Holloway peynî de vat: “Demokrasîyêka xorîne ke merdimî nêrê tebervetene, bêrê girewtene mîyanê prosesî raşta zî şêno bêro viraştene. No fikrêko xerîb nîyo, şêno bêro kerdene. Ez bi zerrî hêvî kena ke dewleta tirke mesajê haştîye yê Ocalanî rê cewabêko pozîtîf bido.”
