Bi Festîvala Sûrî ke do hîrê dewanê Sûrî de pê bêro, cinî û tutî do hunerî dir bêrê têhet. KASED’î veng da ke pêro kesî tewrê atolyeyê ke organîze kenê, bibê.
Komeleya Kultur Huner û Edebîyatî yê Cinîyan (KASED) 6 serrî yo Amed de derheqê cinî û tutan de xebatanê kultur û hunerî keno. Emserre bi projeyê SUR-FEST’î hîrê dewanê Sûrî de cinî û tutan hunerî dir ano têhet. Festîvale do 19ê êlule dest pêbikero û 22ê êlule de peynî bo. Dewan de do atolye, wareyê kayî, kayê zekaya viraşte, atolyeya hûnerê destan pê bêrê. Bernameyê şanî de zî do tîyatro û fîlm, konser pê bêrê.
Salîha Ayata dîyar kerd ke sey KASED 6 serrî yo xebatê cinî û tutan kenê û wina va: “Ma xebatanê xo de derheqê ke cinî eşkenê senîn xo biresnê kultur û hunerî de xebatan kenê. Eynî demî de ma mojnenê ke cinî bi kultur û huner bi ziwanê xo eşkenê şîdetê kulturî ser o weta bidê. Xebatê ma nê hetî ra yenê kerdiş. 6 serrî yo ma ders û kursan danê. Ma festîvala xo bi hetkarîya Brîstîsh Councîl pê anê. Emserre zî ma destekdayîşê Kaltersîvîc pê anê.”
‘Festîvala ma 19ê teşrîna verêne de dest pêkeno’
Salîha Ayata va ke verê xo dayê dewan û wina va: “Ma na festîvale hîrê dewan de kenê. Ma bi destekdayîşê Kaltersîvîc û şaredarîya Sûrî kenê. KASED û şaredarîya Sûrî do pîya hîrê dewan de festîvale pê bîyaro. 19ê êlule de dest pêkeno û heta 22 dewam keno. 19ê aşma de do Kabê de dest pêbikero. Semedê cinî û tutan atolye, kayî do pê bêrê. Şan de zî do Sorjiyan konser bido.”
‘Ma do semedê cinîyan atolyeyan organîze bikerê’
Salîha Ayata dîyar kerd ke 20ê êlule de ma do dewan de xebatan bikerê û va: “Semedê cinî û tutan do atolyeyê tewir bi tewir organîze bibê. Şan de zî do sînema û tîyatro bibo. 21ê êlule de ma do dewa Palukî de bê. Ma do cinî û tutan dir atolye pê bîyarê. Tewr peyîn dawî do koma Govende ya KASED JIN’î vejîyo sehne ser. Dima ra hunermende Şîlan Dora do konser bido. Ma do festîvala xo wina peynî bikerê.”
Salîha Ayata derheqê ke cinî û tutî bi rehetî xo biresnê xebatê kultur û hunerî de zî wina va: “Armancê ma yê esas zextê kulturê kurdan ser o bêrê wedaritiş. Armancê ma o yo ke cinî û tutî bi huner û ziwan xo biresnê xebatê kulturî. 6 serrî yo ma xebatan kenê. Xebatî bi destekdayîşê cinîyan yenê kerdiş. 150 endamê ma est ê. Ma nêzdîyê 10 ekîban dir xebityenê. Armancê ma o yo ke ma bi kolektîf xebatan pîl bikerê.”
