Amed – “Pêvînayîşê Cinî, Kede, Kultur û Hunerî”, ke hetê Şaredarîya Farqînî û KASED’î ra ame organîzekerdene, bi konserêk qedîya. Pêvînayîşê hîrê rojan de ruhê têkoşînê hempar û yewîya cinîyan vejîya vernî.
Şaredarîya Farqînî û Komeleya Cinîyan ya Edebîyat, Kultur û Hunerî (KASED) pêvînayîşî Parka Rindêxan ya qezaya Farqînî ya Amedî de viraştbî; pêvînayîş vizêr şewe qedîya. Taybetî cinîyan pêvînayîşî rê eleqeyêk gird mojna. Festîvale de ke 3 rojî dewam kerd, piştîdayîşê cinîyan û ruhê têkoşînê hemparî vejîya vernî. Cinîyan pêvînayîş de berardiş û keda destanê xo mojnaye.
Hemşaredara Farqînî Sevîm Bîçîcî pêvînayîş de qisey kerd; aye bale ante yewî û piştîdayîşî ser o û dîyar kerd ke çalakîyê winasî do qeza de dewam bikerê. Dima hemwelatijan Koma Govende ya Dîcle Firatî temaşe kerde û govende kerde. Peynî de Koma JinMa vejîye sahne û deyîrî vatî; konser bi deyîranê JinMa qedîya.
