12 serran ra pey merkezê Erziromî de Newroze ameye pîrozkerdene û pîrozkerdişê Newroze de prosesê “Aştî û Komelê Demokratîkî” ame silamkerdene. Hemverfeka HDK’yî Meral Daniş Beştaş pîrozkerdişî de qisey kerd û dîyar ked ke ganî êdî Rayberê Şarê Kurdî Abdullah Ocalan azad bibo.
Erzirom de 12 serran ra pey pîrozkerdişê “Newroza Azadî û Yewîya Demokratîke” ya 2026î bi coşêko pîl ameye pîrozkerdene. Welatijanê Erziromî bi kincanê xo yê neteweyî qadê Newroze yê Otogarê Kehenî pirr kerd û deyîran reyde govende girewte. Pîrozkerdişî de Hemverfeka HDK’yî Meral Daniş Beştaş û Parlamenterê DEM Partî yê Wanî Zulkuf Uçar sey qiseykerdox ca girewt. Pîrozkerdiş seba cangorîyanê têkoşînê azadîye deqîqeyêk girewtişê rêze reyde dest pêkerd. Dimayê rêzgirewtişî ciwanan sloganê, “Bijî Serok Apo” , “Şehîd Namirin” vatê.
‘Kongreya Erziromî Anqara de ameye redkerdene’
Parlamenterê DEM Partî Zulkuf Uçar vejîya sehne ser o û Newroza şarî pîroz kerd. Zulkuf Uçar sîyasetmedarê kurd Salih Muslim yad kerd û vat: “Muslim têkoşînêko bêpeynî da. Şarê kurdî tu wext ey xo vîr ra nêkeno. Na herre şahidîya xoverdayîşê Şêx Seîd, Têgêrayîşê Azadîye û Xalid Begê Cibrî kerdo. Seserrî ra ver tîya de kongreyêk ameye kerdene û na kongre seba heqanê kurd û tirkan bîye. La Anqara de na kongre ameye înkarkerdene û estbîyayîşê şarê kurdî zî ame redkerdene. Bingeyê heme probleman înakarkerdişê na kongre bi. Nika şansêko bîn est o. Proseso ke nika Birêz Ocalan pêşengîya ci keno, seba heqanê her kesî yo. Êdî ganî her kes bibo wayîrê heqanê xo. Ma qonaxêko winasîn de yê ke do statuyê şarê kurdî bêro naskerdene. Çimê heme dinya şarê kurdî ser o yo. O semed ra ganî ma yewîya xo ya netweyî awan bikerê. Se bikerê zî nêeşkenê ma yewbînan ra biaqitnê; kurd û Kurdîstan yew ê.”
‘Kobanî ra seba Vakurî silamî est ê’
Hemverfeka HDK’yî û Parlamentera DEM Partî ya Erziromî Meral Daniş Beştaş zî qisey kerd û bale ant 12 serran ra pey pîrozkerdişê Newroze ya Erziromî ser o û vat: “Mi Kobanî ra silamî ardê. Her ca de adirê Newroze yeno wekerdene û na Newroze xeylê muhîm û manedar a. Şarê kurdî Newroze de waştişê heqanê xo keno û paştî danê vengdayîşê 27ê sibate yê Rayberê Şarê Kurdî Abdullah Ocalanî. Şarê kurdî her ca de vengê xo berz keno. Erzirom de polîtîkayêka taybete est a û bi desan serran o cîyakarî û yewperestîyêk dewam kena. Cîyayê Erziromî Amed, Wan û Colemêrgî ra çin a la tîya de kurdî ameyê redkerdene û rastê asîmîlasyonî ameyê. Kongreya Erziromî de destûrêka bingeyîn a zaf azadîwaz pêameyîişêk bibe labelê na destûre ameye redkerdene.”
‘Ganî Ocalan bireso azadîya xo’
Meral Daniş Beştaş wina dewam kerd: “Ma her tim est bîyê û ma do her tim est bîbê. Birêz Ocalanî vengdayîşê aştî û komelê demokratîkî kerd û vat ke ma eşkenê biçek nê, bidîyalog pêbikerê. Ma zî paştî danê ey. Ma vera nîjadperestî yê, ma terefgirê azadîya ziwanan û dînan ê. Ma azadîya cinîyan pawenê. Ma do bi têkoşînî heme embazanê xo hepisxane ra vejê. Rayraberdişê nê prosesî de ke birêz Ocalan aktoro bingeyîn ê sîyasî yo û muxatab o, ganî êdî azad bibo. Şarê ma paweyê gamanê şênber o.”
Dimayê qiseykerdişan adirê Newroze ame wekerdene û muzîkjenan sehne girewt û şarî deyîran reyde govende girewte.
