Wekîlê DEM Partî yê Amedî Serhat Erenî vat: “Hetê kurdan gamê zaf muhîmî eşt ê ke vere Tirkîya akenê. Eke Tirkîya zî wazena problemanê xo çareser bikero gerek gamanê pêtan û xurtan bierzo. ”
Wekîlê DEM Partî yê Amedî Serhat Erenî ANF’yî rê derheqê averşîyayîşanê peyênan de erjnayîşî kerdî. Erenî derheqê prosesî de nê vatî:
“Seserrî yo têna Tirkîya nê Iraq, Sûrîye û Îran sere de kurdî nasname, kultur, ziwan û bawerîya şaranê tewr qedîman ê Rojhaletê Mîyanênî çîn hesbnayî. Eke şima erjanê şaranê zaf ziwan û kulturî red bikerî vera nê têkoşîn yeno kerdene. No hem xozaya merdimî de hem zî xozaya komelî de est o. Kurdî serserrî yo semedê ziwan û nasnameyê xo têkoşîn kenê. Bi nê têkoşînê kurdan dewletê-neteweyîyî kewtê tengayî. Rijyayîşê Sûrîye zî hetêkî ra pabesteyê nê yo. Hinî eke îmkanê pîya ciwîyayîşî yê şaran, şertê seyyewbînîye nêrê afirnayene krîzî nînê çareserkerdene. Tirkîya seserrî yo polîtîkaya înkar, îmha û redî rayra bena la hinî eşkera yo ke no mumkun nîyo. Nê krîzî Tirkîya hem zere de hem teber de fînaye tengayî û gêrana berê xelisyayîşî. Rayberê Şarê Kurdî eslê xo de cewab da nê gêrayîşî.
Averşîyayîşanê Rojhelatê Mîyanênî û halê şerî ke xeylê wexto dewam keno Tirkîya mecbûr verada ke meseleyanê xo pîya bi kurdan çareser bikero. Des serranê peyênan de ame waştene ke wa kurdî bêrê tesfîyekerdene. Dewleta tirke pêro îmkanê xo fînayî dewre, kewte prosesê tesfîye û çokdayîşî la ser nêkewt. Nêeşkaye kurdan tesfîye bikero. Rîyê têkoşînê kurdan ra meseleyanê esasî yê komelkî yê Tirkîya girdêr bîyî. Rayber Apo îmkano gird da ke verê şaranê Tirkîya û Rojhelatê Mîyanênî bêro akerdene. Kurdan nê hetî ra gamê girdî eşt ê.
Vengdayîşê Rayberê Şarê Kurdî yê 27ê Sibate û tewirê PKK’yî îmkano xurt afirna. Na game mojna ke gerek hinî meseleya kurdan û meseleyê komelkî yê Tirkîya û Rojhaletê Mîyanênî zemînê sîyasetê demokratîkî de bêrê çareserkerdene. Gerek dewlete zî sey kurdan gamanê muhîman bierzo. Hetê kurdan gamê zaf muhîmî eşt ê ke vere Tirkîya akenê. Eke Tirkîya zî wazena problemanê xo çareser bikero gerek gamanê pêtan û xurtan bierzo.
Heta nika belka baro giran milê hetanê cîya cîyayan de bi la badê vengdayîşê Birêz Ocalanî yê 27ê Sibate û eşkerayîya PKK’yî ya 12ê Gulane no barhinî yê sîyasetê demokratîkî yo. Demokrasî û meseleya kurdan têna tesîrê kurdan nêkena, na meseleya heme Tirkîya ya. Eke mesele zemînê şîdetî ra açarîyaya zemînê huqûqî, heta ewro 50 serran de têna rîyê şertanê şerî ra hendê 3 trîlyon dolarî vîndîbîyayîş est o, nê tesîrê pêro şaranê Tirkîya kerdo. DEM Partî kena ke bi têkoşînê hemparî mesele çareser bikero. No têkoşîn gerek têna yê kurdan nêbo, yê pêro şaranê bindestan ê Tirkîya bo. Na berpirsîyarîya esasî ya prosesî ya. DEM Partî seba ke berpirsîyarîya xo bîyaro ca gurîyena. Dewlete, hukmat çîyo ke kewno milê ci nêano ca. Bi ziwan û tewirê xo çiheyf ke semede aştîye çîyo ke hewce keno nêkeno. ”
