Encamnayê Forumê Sûrîye yê 5. de ame vatene ke “Manîfestoyê Aştî û Komelê Demokratîkî” yê Rayberê Şarê Kurdî Abdullah Ocalanî seba awankerdişê Sûrîya demokratîke û yewbîyaye hêvîyêk o.
Forumê Sûrîye ke Hesekê de serkêşîya Partîya Yewîya Demokratîke (PYD) de ame organîzekerdene, bi eşkerakerdişê encamnameyî qedîya. Forumo ke bi sernuşteyê “Manîfestoyê Aştî û Komelê Demokratîkî: Zemînê Awankerdişê Sûrîya Moderne” ameyo viraştene, 120 sîyasetmedar, roşnvîr, temsîlkarê rêxistinan, aktîvîst û temsîlkarê eşîranê ereban beşdarê ci bîyî.
Endamê Konseya Serekîye ya PYD’yî Silêman Erebî encamnameyê forumî eşkera kerd. Sernuşteyê muhîmî yê encamnameyî nê yê:
- Peymana mabênê HSD û Hukmetê Demkî yê Sûrîye de ganî bêro pawitene
- Seba çareserîya domdare ganî dîyalogê neteweyî yê pêroyî bêrê ramitene
- Bi beşdarîya heme yewînan ganî kongreyêka neteweyî kom biba û peymanêka komelkî ya newîye amade biba
- Vatişê nefretî ganî red bibê û peymana aştî amade biba
- Mabênê şaran de ciwîyayîşê pîya û aştîya kulturî ganî bêra xurtkerdene
- Têgêrayîşê cinîyan ê demokratîkî ganî bibê aktorê bingeyin ê prosesî ra yew
- Seba azadîya Rayberê Şarê Kurdî Abdullah Ocalanî ganî têkoşîn bêro dayene
- Nêzdîbîyayîşê dewleta merkezî ganî biqedîyo, ganî xerîteya rayîrî ke heqanê şarî garanît kena, amade biba
- Rolê cinîyan prosesê aştî de ganî xurt bibo
- Fransa, Amerîka û Brîtanya ganî berpirsîyarîya xo ya garantorîye temam bikerê
Encamnemeyî de ame îfadekerdene ke Manîfesto seba awankerdişê Sûrîya demokratîke û yewbîyaye alternatîfêko sîyasî û entelektuel pêşkêş keno. Qedîyayîşê forumî de ame dîyarkerdene ke projeyo demokratîk “seba sûrîyeyijan tena alternatîfêk nîyo, eynî wext de hêvîyêk o.”
