Elewîyanê ereb vera qirkerdişê Elewîyanê Sûrîye vernîya Meclîsê Tirkîya de eşkerayî daye. Eşkerayî de seba vindarnayîşê qirkerdişî vengda îqtîdarî.
Temsîlkarê sazgeh û komelanê Elewîyanê Ereb ke şaristananê Edene, Hatay û Mersînî ra ameyê Anqara vera qirkerdişê elewîyanê Sûrîye vernîya Meclîsê Tirkîya de eşkerayî daye. Girseyo ke waşt verê berê Çankaya yê Meclîsî de eşkerayî bido hetê polîsan ra ame astengkerdene. Ney ser o girse hemverê Meclîsî de eşkerayî daye. Endam û tamsîlkarê partîyanê sîyasî, komele, sazgehê elewîyan û Parlamenterê DEM Partî Ayten Kordu, Perîhan Koca û Celal Firat zî beşdarê eşkerayî bîyê. Eşkerayî de pankarto ke ser o “Qirkerdişê vera Elewîyanê Sûrîya vindarnê” nuştebi, ame girewtene.
Sewbîna girse dovîz û fotografî ke qirkerdişê elewîyan şermezar kenê zî girewtê. Girseyî bêmabên sloganê sey, “Kujer Colanî bila bê darizandin”, “Ji komkujiya Elewiyan re bêdeng nemîne” û “Gelê Elewî ne bi tenê ye” vatê.
Eşkerayî ra ver rojnameger û pisporê Rojhelatê Mîyanênî Musa Ozugurluyî qisey kerd û îfade kerd ke elewîyî qirkerdişêko pîl reyde rîbirî yê û vat ke ganî bêvengîya vera nê qirkerdişî biqedîya û Tirkîya û dinya vera nê qirkerdişî wirzîyo lingan ser o. Musa Ozugurluyî dîyar kerd ke Tirkîya biwaza eşkena bi telefonêk nê qirkerdişî vindarna û vengda îqtîdarê AKP’yî kerd ke kaosêko girdî ra ver têbîgêra.
‘Bêvengî hemkarî ya’
Metnê eşkerayîya hempare hetê Serekê Komela Piştgirîye şarê elewî yê erebî ra Hamît Karaoglarindan ra ame wendene. Hamît Karaoglarindan îfade kerd ke şîdetê vera elewîyanê Sûriya bîyo qirkerdişêko sîstematîk û wina vat: “Ganî raya pêroyî ya mîyanneteweyî têbigêra. Na bêvengî nêyena qebulkerdene. Lazim o dewletê mîyanneteweyî û raya pêroyî û raya pêroyî vera nê qirkerdişî bikewa mîyanê têgêrî.”
Waştişê sazgehanê elewîyan
Hamît Karaoglarindan diyar kerd ke ê bi hema şaranê ke rastê qirkerdişî yenê, înan reyde mîyanê piştgirîye de yê û waştişê xo wina rêze kerdê:
* Ganî hêrişê qirkerdişî yê vera elewîyan bilez bêrê vindarnayene
* Ganî komelê mîyanneteweyî mekanîzmayê cewabdayîşî yê bilez û tesîrdara bîyara ca.
* Ganî korîdorêkê hetkarîya merdimîye bêra awankerdene ke Berê Sînor ê Yayladagî dest pêbikero. Meclîsê Tirkîya na babete de wezîfe û berpirsîyarîya xo bîyara ca.
* Ganî hetkarîya merdimîye seba herême bêra xurtkerdene û rêxistinê mîyanneteweyî bilez biresê qade.
* Ganî heme şar û bawerî prosesanê sîyasî yê derheqê ameyoxê Sûrîye de bêrê temsîlkerdene.
‘Ganî heyetêkê parlamenteran vîyaro Sûrîyê bibo’
Eşkerayî ra pey parlamenterê DEM Partî Celal Firat zî qisey kerd û vera qirkerdişan reaksîyon mojna û wina vat: “Ê ke Colanî qesran de pêşwazî kenê berpirsîyarê nê qirkerdişî yê. Ganî îqtîdar êdî qirkerdişî rê bêveng nêmano. Ganî êdî no qirkerdiş vindaro. Ma vengdanê Wezîrê Karanê Teberî Hakan Fîdan ke heyetêkê parlamenteran bierşawo Sûrîye û no qirkerdiş vindaro. Eke Meclîsî ra komîsyonêk nêşîro ma do sey DEM Partî şêrê.”
Eşkerayî ra pey heyetêk seba ke partîyanê sîyasî reyde Meclîs de pêvînayîşan bikero, vîyart Meclîsî û do partîyanê sîyasî reyde pêvînayîşan bikero.
