Endamê Meclîsê PJAK’î Ehwan Çîyakoyî derheqê hemsengîyanê sîyasîyan ê Rojhelatê Mîyanênî, nakokîyanê Îran û hêzanê dinya û rolê stratejîk ê kurdan de vat ke Rojhelatê Kurdîstanî merheleyêka krîtîke de yo: “Vera her rewşe ganî kurdî amadekarîyanê xo yê rêxistinî û leşkerî xurt bikerê ke tehdîdan pûç bikerê û firsendan qezenc bikerê.”
Nakokîya Îran û Amerîka ke badê Şorişê Îslamî yê 1979î dest pêkerd, bi bernameyê nukleerî, vîyartişê Amerîka yê peymana JCPOA (2018) û ambargoyan xorînêr bîya; şer zafane erdê welatanê hîrêyinan de, Iraq, Sûrîye, Libnan û Yemen de, dewam keno. Çîyakoyî na rewşe Ajansa Welat rê nirxnaye.
‘Îran bi projeyê Hîlalê Şîa menfeetê hêzanê herêmkî û cîhanî eştî xeterî’
Çîyakoyî vat ke rejîmî 40–45 serran de binê nameyê “Hîlalê Şîa” de waşto serdestîya xo herême de vila bikero û zereyê Îranî de zî sîstemêkê îdeolojîko req awan kerdo ke bi waştişanê şarî pê nêgêno; têgêrayîşê demokratîk û çepgirî ameyî xeneqnayene.
‘Hêzê teberî wazenê Îranî bi sîstemê xo girê bidê’
Çîyakoyî ard ziwan ke hêzê rojawanî seba heqanê şaranê Îranî ney, seba menfeetanê xo vera Îranî vindertê: “Ê wazenê Îran sîyaset, dadgeh û perwerde de nerm bibo û xo bi sîstemê kapîtalîst ê dinya ve girê bido. Erdnîgarîya Îranî muhîm a: sey pirdêk mabênê Rojhelat û Rojawanî de ya û Tengava Hurmuzî kontrol kena.” Çîyakoyî va ke Îran hem tersê Îsraîl û lobîyanê aye ra hem zî reqabetê teknolojîk ê Çîn, Rûsya û Amerîka ra pozîsyonêka xeternake de ya; waştişanê Amerîka û Îsraîlî qebul nêkena çunke tersena ke otorîteya “Hîlalê Şîa” dest ra bido.
‘Ganî kurdî vera hesabanê hêzan sîyasetêko hişyar bikerê’
Çîyakoyî vat ke hem rejîmê Îranî hem hêzê teberî hesabê xo kurdan ser o kenê: “Îran zana ke eke kurdî bi tecrubeyê xo yê tarîxî û cografyaya xo ya hîraye bikewê hereket, nêşêna xover bido. Hêzê teberî zî wazenê kurdan seba amancanê xo bixebitnê. Ganî kurdî mabênê nakokîyan de xo nêdê xebitnayene la firsendan seba menfeetanê neteweyî û komelkîyan bixebitnê.” Çîyakoyî yewîya partîyanê Rojhelatê Kurdîstanî sey waştiş û zerûretê komelî nirxnaye û vat ke dîyalogo mewcûd eyinî yo la ganî pratîk de bibo îradeyêko xurtêr.
‘Destpêkê 2027î de îhtîmalê bedilîyayîşan est o’
Çîyakoyî peynî de va: “Ê ke vanê şer newe dest pêkeno, xelet ê; şer xora est bî. Îhtîmalêko gird est o ke peynîya 2026î û destpêkê 2027î de şerêko leşkerî sewîyeyêka newîye de dest pêbikero. Îhtîmalo dîyin zî o yo ke hîrabîyayîşê ambargoyan Îranî bikero krîzêko xorîn û serewedartişan bîyaro. Her di rewşî zî hem firsend hem tehdîd ê; eke ma sey têgêrayîş û şar hetê rêxistinî û leşkerî ra xo rind amade bikerê, ma şênê tehdîdan pûç bikerê û firsendan seba azadîya şarê xo bixebitnê.”
